Accessibility links

Rəsul Rəzəvi sərbəst buraxıldı, Nasir Xülusi həbsə məhkum edildi


Türk fəal Rəsul Rəzəvi məhkum olduğu 13 aylıq həbs müddətini tamamladıqdan sonra Təbriz zindanından sərbəst buraxılarkən, digər türk fəal Nasir Xülusinin Urmiyə məhkəməsi tərəfindən 6 il həbs cəzasına məhkum olunduğu bildirilir.

Güney Azərbaycan Televiziyası (Günaz TV) və Araz News kimi internet portallarının məlumatına görə, Nasir Xülusi keçən fevral ayında nəzarət altına alınıb və Sepah həbsxanasında 3 həftədən artıq sorğu-sual edildikdən sonra 500 milyon tümənlik (155 min dollar) zəmanət qarşılığında müvvəqəti azadlığa buraxılmışdır.

Araz News Xülusinin “milli təhlükəsizliyi pozmaq” və “rejimə qarşı təbliğat” aparmaq ittihamı ilə mühakimə edildiyini bildirib.

Rəsul Rəzəvinin məhkum olduğu 13 aylıq həbs müddətini tamamladıqdan sonra Təbriz Mərkəzi Zindanından azadlığa buraxıldığına dair məlumat Günaz TV tərəfindən yayımlanıb.

Rəzəvi dəfələrlə müxtəlif tədbirlər, o cümlədən, Uyğur türklərinə dəstək mitinqləri, Urmiyə Gölü ilə bağlı aksiyalar və “anti-irqçilik” nümayişlərinə qatıldığı zaman nəzarət altına alınmış və məhkəmədə həbs hökmü ilə qarşılaşmışdır.

Yayılan məlumata görə, türk fəalın bu günlərdə tamamladığı 13 aylıq həbs hökmü onun 2015-ci ilin noyabr ayında keçirilən “anti-irqçilik” nümayişləri ilə əlaqəli çıxarılmışdı.

2015 ilinin noyabr ayında İranın dövlət televiziyasında yayımlanan “Fitilə” adlı uşaq proqramında türklərin aşağılanması ardından baş qaldıran kütləvi etirazlar zamanı və ondan sonra bir çox milli fəal İran Azərbaycanının müxtəlif şəhərlərində nəzarət altına alınıb, həbs və şallaq cəzasına məhkum edildilər.

Fikirləriniz

Show comments

XS
SM
MD
LG