Accessibility links

ABŞ-da Johnson&Johnson COVID-19 peyvəndi ilə bağlı araşdırmalar davam edir


Johnson & Johnson’ın COVID-19 peyvəndi ABŞ hökumət səhiyyə orqanları tərəfindən daha çox araşdırma altına alınıb.

Xəstəliklərə Nəzarət və Profilaktika Mərkəzinin (CDC) direktoru Dr.Roşel Valenski agentliyin bir dozalı vaksin ilə əlaqəli ehtimal olunan əlavə yan təsirlər barədə məlumatları araşdırdığını bildirib.

Valenski agentliyin Ağ Evdəki brifinqi zamanı jurnalistlərə "belə halların çox olmaması bizi ümidləndirir, ancaq nə baş verdiyini araşdırırıq" deyib.

CDC və ABŞ-ın Ərzaq və Dərman İdarəsi ilə (FDA) birgə 18-48 yaş arası altı qadının peyvənddən sonra nadir, lakin ciddi qan laxtalanma xəstəliyinə tutulmasından sonra keçən həftə Johnson & Johnson peyvəndinin tətbiqinə fasilə verməyə çağırıblar. Bir qadın ölüb, biri ağır vəziyyətdə xəstəxanaya yerləşdirilib.

Altı qadın peyvənd təsdiqləndikdən sonra vaksin edilmiş 7 milyon amerikalı arasındadır.

Johnson & Johnson peyvəndi ABŞ vaksin tədarükünün az bir hissəsini təşkil edir, lakin mütəxəssislər problemin daha çox insanın vaksinasiyadan keçmək istəməməsinə səbəb ola biləcəyini deyib.

Milli Allergiya və Yoluxucu Xəstəliklər İnstitutunun rəhbəri Dr. Entoni Fauçi müstəqil CDC məsləhət panelinin bu həftənin sonunda yenidən bir araya gəldiyi zaman peyvənddən istifadənin dayandırılmasının aradan qaldırılmasını gözlədiyini deyib.

Bununla əlaqədar olaraq, Johnson & Johnson COVID-19 peyvəndinin milyonlarla dozasını məhv edən Baltimor mərkəzli istehsal zavodu Emergent BioSolutions FDA-nın tələbi ilə keçən həftə yoxlamadan sonra fəaliyyətini müvəqqəti dayandırdığını açıqlayıb. Emergent zavodunun işçiləri Johnson & Johnson peyvəndini AstraZeneca tərəfindən hazırlanmış koronavirus peyvəndi ilə qarışdırmışdılar və Johnson & Johnson peyvəndinin 15 milyon dozasını yararsız hala gətirmişdilər.

Cons Hopkins Koronavirus Resurs Mərkəzinə görə, aprelin 20-nə qədər dünyada 142,1 milyondan çox insan COVID-19-a yoluxub, ölənlərin sayı isə 3 milyondan çoxdur.

Şərhlərə bax

XS
SM
MD
LG