Mədəniyyət nazirinin keçmiş müavini Rafiq Bayramovun həbs müddəti 4 il 6 aya endirilib.
Bu barədə Bakı Apellyasiya Məhkəməsində hakim Elmar Rəhimovun sədrliyi ilə keçirilən prosesdə qərar qəbul edilib.
Avqustun 17-də Bakı Ağır Cinayətlər Məhkəməsi mədəniyyət nazirinin keçmiş müavini Rafiq Bayramovu 8 il həbsə məhkum edib.
Məhkəmə, həmçinin onun üzərinə həbs qoyulan əmlakının dövlətin xeyrinə müsadirə edilməsi barədə qərar çıxarıb.
Bayramov son sözündə özünü təqsirkar bilməyib. O, vəzifə səlahiyyətlərindən sui-istifadə ilə bağlı ittihamları da rədd edib.
Bayramovun sözlərinə görə, onun sənədlərə imza atmaq səlahiyyəti olmayıb və o maddi məsul şəxs olmayıb. O, həmçinin rüşvət ittihamını da qəbul etməyib.
Rafiq Bayramov və nazirliyin Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov 2020-ci ilin mayında Dövlət Təhlükəsizliyi Xidmətinin əməliyyatı nəticəsində saxlanılıb.
Hər iki şəxsə qarşı vəzifə səlahiyyətlərindən sui-istifadə, mənimsəmə, vəzifə saxtakarlığı ittihamları irəli sürülüb.
Sonradan Sultanova qarşı cinayət işi ayrı icraata ayrılıb.
