Naxçıvan Muxtar Respublikasının Babək rayonu Nehrəm qəsəbəsi 3 saylı tam orta məktəbində aparılan yenidənqurma işləri ilə əlaqədar binanın uçması nəticəsində ölənlərin sayı dördə çatıb.
Bu barədə Baş Prokurorluğun Mətbuat xidməti rəsmi məlumat yayıb.
Məlumata görə, Dövlət Şəhərsalma və Arxitektura Komitəsinin Babək rayon idarəsində fəhlə işləyən üç nəfər hadisə yerində ölüb, bir nəfər isə müxtəlif dərəcəli bədən xəsarətləri alaraq xəstəxanaya yerləşdirilib.
Prokurorluq bildirib ki, axtarış-xilasetmə tədbirləri nəticəsində dağıntılar içərisində daha bir nəfərin cəsədi aşkar edilərək çıxarılıb.
Hadisə ilə bağlı hələlik zərərçəkən və ölənlərin yaxınlarından münasibət almaq mümkün olmayıb.
Qeyd edək ki, hadisə martın 31-də baş verib.