ABŞ-ın və Ukraynanın Azərbaycandakı səfirlikləri Bakıdakı partlayış zamanı ölən şəxsin ailəsinə aprelin 4-də başsağlığı verib.
“Aprelin 3-də baş vermiş partlayış nəticəsində həlak olanları yad edir, onların ailələrinə dərin hüznlə başsağlığı veririk. Biz, həmçinin, xəsarət alanların tezliklə sağalmasını arzu edirik” ABŞ Səfirliyi Facebook səhifəsində qeyd edib.
Öz növbəsində, Ukraynanın Azərbaycandakı Səfirliyindən hadisə ilə bağlı Amerikanın Səsinə bunlar deyilib.
“Bakının mərkəzində gecə baş verən partlayış nəticəsində ölənlərin olması xəbəri bizi son dərəcə sarsıtdı. Həlak olanların ailələrinə dərin hüznlə başsağlığı verir və xəsarət alanların tezliklə sağalmasını diləyirik.”
Aprelin 3-də gecə saatlarında Bakı şəhərinin mərkəzindəki gecə klubunda baş verən partlayış nəticəsində ölən və xəsarət alanlar var.
Baş Prokurorluğun Mətbuat Xidmətinin məlumatına görə, partlayış nəticəsində hazırda ölənlərin sayı 1 nəfərdir.
"37 nəfər müxtəlif dərəcəli bədən xəsarətləri alıb, onlardan dördünün vəziyyəti çox ağır qiymətləndirilir. Həmçinin 14 avtomobil, 1 mənzil və 2 qeyri-yaşayış obyektinə ziyan dəyib."
Prokurorluq bildirir ki, hadisənin ilkin ehtimallarla binada qaz təchizatının olmaması səbəbindən orada quraşdırılan qaz balonundan sızma nəticəsində baş verməsi müəyyən olunub.
Fövqəladə Hallar Nazirliynin Xilasetmə Xidmətinin məlumatına görə, hadisə yerində əməliyyat şəraiti qiymətləndirilərkən gecə klubu kimi fəaliyyət göstərən obyektdə yanğınla nəticələnən partlayışın baş verdiyi və obyekt daxilində dağıntı yarandığı müəyyən olunub.
Tibbi Ərazi Bölmələrini İdarəetmə Birliyi (TƏBİB) 24 nəfərin xəstəxanaya yerləşdirildiyini bildirib.
"Xəstəxanalara yerləşdirilən 24 nəfərdən 6 nəfərin vəziyyəti ağır, 12 nəfərin vəziyyəti orta ağır, 6 nəfərin vəziyyəti stabil qiymətləndirilir. Xəsarət alanlardan ikisi xarici ölkə ( İtaliya və Seneqal) vətəndaşıdır. Seneqal vətəndaşının vəziyyəti ağır qiymətləndirilir."
TƏBİB-in məlumatına görə, xəstəxanalara yerləşdirilən şəxslərin əksəriyyəti yanıq xəsarətləri alıb.
“Azəriqaz” İstehsalat Birliyi bildirib ki, gecə klubunda propan qaz balonu partlayıb.
