Moskva məhkəməsi müxalif siyasətçi Aleksey Navalnının doqquz illik həbs cəzasını təsdiqləyib. Navalnı və tərəfdarları bu həbsin siyasi motivli olduğu haqda daha öncə bəyanat verib.
Navalnı çərşənbə axşamı Vladimir regionundakı həbsxanadan videobağlantı ilə dinləmələrdə iştirak edib.
Kreml tənqidçisi məhkəmədəki son çıxışından Rusiya hakimiyyətini Ukraynaya davam edən əsassız işğala görə qınamaq üçün istifadə edib və ona qarşı irəli sürülən bütün ittihamların siyasi motivli olduğu barədə əvvəlki bəyanatlarını təkrarlayıb.
Məhkəmə martın 22-də Navalnı mənimsəmədə və məhkəməyə qarşı hörmətsizlik ittihamlarında təqsirli bilindikdən sonra hökm verib. Navalnı və tərəfdarları ittihamların siyasi motivli olduğunu dəfələrlə vurğulayıb.
Navalnı ötən ilin yanvarında Almaniyadan Moskvaya gələrkən həbs edilmişdi. O, Almaniyada Avropa laboratoriyalarının sovet tipli sinir maddəsi kimi təyin etdiyi zəhərli hücumdan müalicə olunurdu.
Daha sonra o, xaricdə müalicə olunduğu üçün şərti azadlığın şərtlərini pozduğuna görə 2,5 il həbs cəzasına məhkum edildi. İlkin məhkumluq geniş şəkildə qondarma, siyasi motivli iş kimi qiymətləndirilir.
Navalnı “Noviçok” tipli kimyəvi maddə ilə zəhərlənməsinə görə Rusiya prezidenti Vladimir Putini günahlandırıb. Kreml hücumda hər hansı rolu olduğunu rədd edib.
Beynəlxalq təşkilatlar Navalnı siyasi məhbus hesab edir.
Avropa İttifaqı, ABŞ prezidenti Co Bayden və digər beynəlxalq rəsmilər Rusiyadan 45 yaşlı Kreml tənqidçisini azad etməyi tələb ediblər.
Navalnı hazırda Moskvadan 200 kilometr şərqdə yerləşən Pokrov şəhərindəki həbsxanada cəza çəkir. Onun yeni hökmə görə daha sərt rejimli həbsxanaya köçürüləcəyi gözlənilir.
