Accessibility links

Ukrayna ölkənin şimal-şərqində ölənləri axtarır


Ukrayna bu ayın əvvəlində ildırım sürəti ilə Rusiyadan geri aldığı ölkənin şimal-şərqindəki İzyum və digər şəhərlərdəki döyüşlərdə həlak olanları axtarıb.

İzyum meri Valeri Marçenko dövlət televiziyasına bildirib ki, eksqumasiya aparılır, qəbirlər qazılır və bütün qalıqlar Xarkiva aparılır.

"İş daha iki həftə davam edəcək" - deyə, Marçenko əlavə edib.

Ukrayna prezidenti Vladimir Zelenski şənbə günü bildirib ki, müstəntiqlər Rusiyanın aylardır saxladığı Xarkiv vilayətinin şimal-şərqində Ukraynanın geri aldığı 20-dən çox şəhərdən biri olan İzyumda dəfn edilən bəzi əsgərlərə qarşı işgəncələrə dair yeni sübutlar aşkar edib. Onun sözlərinə görə, bir yerdə 17 cəsəd tapılıb, onlardan bəzilərində işgəncə izləri var.

Ukrayna rəsmiləri keçən həftə İzyum yaxınlığındakı meşəlik ərazilərdə 440 cəsədin aşkar edildiyini bildirib. Ölənlərin mülki şəxslər olduğu təsbit edilən kəşfin müharibə cinayətlərinin Rusiya qüvvələri tərəfindən törədildiyini sübut etdiyini deyib.

Xarkiv vilayəti üzrə prokurorluğun rəisi Oleksandr İlienkov Reuters xəbər agentliyinə deyib: "əlləri bağlı cəsədlərdən birində boyun ətrafında ip aşkar edilib".

Cəsədlərin məhkəmə-tibbi ekspertizası davam edir.

Moskva təxminən 7 aya yaxın davam edən işğalı zamanı mülki şəxsləri hədəf aldığını dəfələrlə inkar edib. Kreml məzarların tapılması ilə bağlı heç bir açıqlama verməyib.

Bu ayın əvvəlində Xarkiv vilayətini tərk edən rusiyapərəst administrasiyanın rəhbəri ukraynalıları İzyumda vəhşiliklər törətməkdə ittiham edib.

XS
SM
MD
LG