BMT-nin Qaçqınlar üzrə Ali Komissarı Filippo Qrandi BMT İcraiyyə Komitəsində açılış nitqi ilə üzv dövlətlərə etnik və milli mənsubiyyətindən asılı olmayaraq, münaqişə və təqiblərdən qaçan insanları müdafiə etməyə çağırıb.
BMT-nin Qaçqınlar üzrə Agentliyi (UNHCR) silahlı münaqişə, zorakılıq, ayrı-seçkilik, təqib və iqlim sarsıntıları nəticəsində məcburi köçkünlərin sayının 100 milyona çatdığını bildirir.
Ali Komissar Filippo Qrandi deyib ki, iqlimlə bağlı fövqəladə vəziyyət getdikcə daha çox yerdəyişmələrə səbəb olur və artıq kökündən qopmuş insanların həyatını çətinləşdirir.
"Biz bunu məsələn, insanların münaqişə və quraqlığın qarışığı səbəbindən qaçmağa məcbur olduğu Afrika Buynuzunda görürük. 2021-ci ilin yanvar ayından etibarən təkcə Somalidə bir milyondan çox insan qaçqın düşüb. Qaçqınların təxminən 80%-i belə ölkələrdəndir. Onlar ən çox fövqəladə iqlim vəziyyətindən təsirlənirlər" - deyə, o əlavə edib.
Afrikalı qaçqınların əksəriyyəti təhlükəsizlik üçün qonşu ölkələrə qaçır. Bununla belə, çoxları sığınacaq və daha yaxşı həyat axtarışında Avropaya təhlükəli səyahət edir.
Qrandi qeyd edib ki, Əfqanıstan və Yaxın Şərq kimi dünyanın digər yerlərindən münaqişə və təqiblərdən qaçan qaçqınlar çox vaxt Avropa ölkələri tərəfindən geri qaytarılır.
Onun sözlərinə görə, bu qaçqınların qəbulu Avropa ölkələrinin Rusiyanın öz ölkələrinə təcavüzündən qaçan yeddi milyona yaxın ukraynalı qaçqını səxavətlə qarşılaması ilə tamamilə ziddiyyət təşkil edir.
"Ukrayna böhranı illər ərzində bəzi siyasətçilərdən eşitdiyimiz o qədər mifləri ifşa etdi: Avropa doludur! İctimai rəy daha çox qaçqın qəbul etməyin əleyhinədir".
O deyib ki, sığınacaq axtaranların çox vaxt zorakılıq yolu ilə əraziyə girişini rədd etmək cəhdləri aradan qaldırılmalıdır.
"Mən bu qitədəki bəzi siyasətçilərin seçicilərinə eşitdiklərini də rədd edirəm: ukraynalılar "əsl qaçqın"dır, lakin dünyanın müxtəlif yerlərindən oxşar dəhşətlərdən qaçanlar deyil. Bu münasibəti yalnız bir sözlə müəyyən etmək olar: irqçilik".
Qrandi əlavə edib ki, üzv dövlətlərin beynəlxalq müdafiə öhdəliklərini yerinə yetirməməsi dərin narahatlıq doğurur.
