Amerikanın Asiyadakı iki ən yaxın müttəfiqi arasında münasibətlərin istiləşməsinə işarə olaraq, ABŞ prezidenti Co Bayden bazar günü Yaponiyanın Hiroşima şəhərində Böyük Yeddilik qrupunun sammiti çərçivəsində Yaponiyanın baş naziri Fumio Kişida və Cənubi Koreya prezidenti Yun Suk Yeol ilə görüşüb.
Bayden danışıqlardan sonra jurnalistlərə deyib: “Yaponiya müdafiə büdcəsi baxımından real nəticə əldə edib və Cənubi Koreya ilə yaxınlaşmanın başlanğıcı kimi addım atıb”.
İclasın gündəmində Şimali Koreyanın artan nüvə və raket təhlükəsi, Çinin iddialılığı, üç ölkəni daha yaxından birləşdirən iki regional təhlükə yer alıb.
Ağ Evin bəyanatında deyilir ki, liderlər Şimali Koreyanın nüvə və raket təhdidləri qarşısında yeni koordinasiya ilə iqtisadi təhlükəsizlik və müvafiq Hind-Sakit Okean strategiyaları da daxil olmaqla, “üçtərəfli əməkdaşlığı yeni zirvələrə necə qaldırmağı” müzakirə edib.
Milli Təhlükəsizlik Şurasının sözçüsü Con Kirbi cümə günü Amerikanın Səsinə müsahibəsində bildirib ki, üç liderin Pekinin yaratdığı regional təhlükə ilə bağlı fikirləri böyük ölçüdə üst-üstə düşür.
Yaponiya və Cənubi Koreya ABŞ-ın müqavilə üzrə müttəfiqləridir. İkinci Dünya Müharibəsində Tokionun məğlubiyyətindən sonra Birləşmiş Ştatlar Yaponiyanı işğal edib və ölkədə böyük hərbi mövcudluğu saxlamaq müqabilində Yaponiyanı müdafiə etməyi öhdəsinə götürüb.
1953-cü ildə Koreya yarımadasında 1950-53-cü illər müharibəsindən sonra hər iki tərəf ABŞ-Koreya Qarşılıqlı Müdafiə Müqaviləsi imzalayıb və bu müqavilə ABŞ-ın Koreya yarımadasında davamlı hərbi mövcudluğunun əsasını təşkil edib.
Bununla belə, Yaponiya-Cənubi Koreya əlaqələri 1910-cu ildən Yaponiyanın İkinci Dünya Müharibəsinin sonunda məğlubiyyətinə qədər Tokionun Koreyanı vəhşicəsinə işğalından sonra tarixi düşmənçilik səbəbindən gərginləşib.
Bəzi daxili müxalifətə baxmayaraq, Yun və Kişida ikitərəfli təhlükəsizlik və iqtisadi əməkdaşlığı genişləndirərək yaxınlaşmalarını davam etdirir.
Kişida G-7 üzvü olmayan Cənubi Koreyanı sammitə Avstraliya, Braziliya, Komor, Kuk adaları, İndoneziya, Hindistan və Vyetnam liderləri ilə birlikdə müşahidəçi qismində dəvət edib.
