Ukrayna rəsmilərinin verdiyi məlumata əsasən, mayın 24-ü səhər saatlarında Ukraynanın Dnepr şəhərindəki klinikaya endirilən raket zərbəsi nəticəsində bir nəfər ölüb, ikisi uşaq olmaqla, azı 15 nəfər yaralanıb.
Yerli media Dneprdə ikimərtəbəli binada baş verən yanğını əks etdirən videogörüntülər paylaşıblar. Ukrayna prezidenti Vladimir Zelenski bəyanatında hücumu həyata keçirən “qeyri-insan”-ların məğlub edilməli olduğunu deyib.
Rusiyanın cənubundakı Krasnodar şəhərində yaşayış binasına zərər vuran partlayışa iki pilotsuz təyyarə səbəb olub. Bu barədə cümə günü vilayət qubernatoru bildirib. “Binalara müəyyən zərər dəysə də, kritik infrastruktura ziyan dəyməyib. Ən əsası isə tələfat olmayıb”, - deyə, qubernator Veniamin Kondratyev sosial mediada açıqlamasında bildirib.
Eyni gün Rusiyanın Ukrayna ilə həmsərhəd bölgəsindəki şəhər Ukrayna artilleriyasının atəşinə məruz qalıb. Qraivoron şəhəri bir neçə saat atəş altında qalıb.
