Azərbaycanlı müğənni Eldar Qasımov və müxtəlif ölkələrdən 19 nəfər beynəlxalq musiqi peşəkarı musiqinin sosial dinamikada roluna həsr olunmuş Beynəlxalq Ziyarətçi Liderlik (The International Visitor Leadership Program -İVLP) mübadilə Proqramı çərçivəsində ABŞ-yə səfər edib.
ABŞ səfirliyinin iyulun 23-də yaydığı məlumata görə, qrup musiqi janrlarının müxtəlifliyə müsbət təsiri, iqtisadiyyat və cəmiyyətin inkişafında musiqi və incəsənətin rolu, əqli mülkiyyət hüquqları və təsviri sənətdə sahibkarlıq haqqında səmərəli söhbətlər aparmaq üçün Nyu-York, Vaşinqton, D.C., Los-Anceles, Cincinnati və Nyu Orleanda ifaçılıq sənətində fəal olan amerikalılarla görüşlər keçirib.
"10 ildən sonra bura (Vaşinqtona) qayıtdım, bu dəfə tam başqa hisslər bəxş edir. İşgüzar görüşlər, mədəni eventlər, əziz insanlarla keçən axşamlar, burda başqayam elə bil. Və məhz burda anladım ki, ABŞ öz xalqına məxsusdur. Bir-birindən nə qədər fərqli olsalar da, gücləri birlikdədir", müğənni Facebook səhifəsində yazıb.
Eldar Qasımov 2011-ci ildə Nigar Camalla ilə birlikdə Avroviziya Mahnı Müsabiqəsinin qalibi olub. O həmçinin bir sıra beynəlxalq müsabiqələrin qalibidir.
