Türkiyənin milli müdafiə naziri Yaşar Gürel “Mustafa Kamal Atatürk-2023” birgə taktiki təlimlərini müşahidə etmək üçün Azərbaycana gəlib.
Oktyabrın 24-də təlimlərdə "Yüksək səviyyəli müşahidəçi günü" keçirilir.
Azərbaycan Müdafiə Nazirliyinin Mətbuat xidmətinin məlumatına görə, Türkiyənin milli müdafiə naziri Yaşar Güreldən başqa, təlimlərin yüksək səviyyəli müşahidəçiləri arasında Azərbaycanın müdafiə naziri Zakir Həsənov, Tacikistan hərbi idarəsinin rəhbəri Şerali Mirzo, Qazaxıstan Müdafiə Nazirliyinin Hərbi Təhsil və Elm Departamentinin rəisi Jumabek Axmetov, Özbəkistanın müdafiə nazirinin döyüş hazırlığı üzrə müavini Kadirjon Tursunov, həmçinin Türkiyənin müdafiə sənayesi sahəsində fəaliyyət göstərən bir neçə şirkətinin rəhbərləri və nümayəndələri var.
Mətbuat xidməti bildirir ki, təlim qərargahına gələn qonaqlar birgə taktiki təlimin ssenarisi və icra edilən fəaliyyətlər barədə məruzələri dinləyib.
“Məruzə olunub ki, Bakı şəhəri, Naxçıvan Muxtar Respublikası və azad olunmuş ərazilər də daxil olmaqla ölkəmizin müxtəlif istiqamətlərində keçirilən Azərbaycan-Türkiyə birgə taktiki təliminə hər iki ölkənin müxtəlif qoşun növündən ümumilikdə 3000-dək şəxsi heyət, 130 ədəd zirehli texnika, 100-dək artilleriya vasitəsi, 20-dən artıq aviasiya və uçuş vasitələri, eləcə də mühəndis texnikası və kiçik botlar cəlb olunub.
Təlimdə müasir döyüş üsullarından istifadə etməklə artilleriya, aviasiya və digər qoşun növlərinin hərbi əməliyyatlarda tətbiqi, onların qarşılıqlı əlaqədə fəaliyyətinin təşkili və şərti düşmənin dərinliyinə desant endirilməsi üzrə müxtəlif tapşırıqlar icra edilir.
Əsas diqqət qoşunların qarşılıqlı əlaqədə fəaliyyətləri zamanı döyüş uzlaşmasının təmin edilməsi, idarəetmənin təkmilləşdirilməsi, təcrübə mübadiləsi və şəxsi heyətin peşəkarlığının artırılmasına yönəldilib”, məlumatda qeyd edilir.
Forum