ABŞ-ın BMT-dəki səfirinin sözlərinə görə, ABŞ İsrailin Qəzzadakı müharibəsinə dərhal atəşkəs tələb edən və bu həftə Birləşmiş Millətlər Təşkilatının Təhlükəsizlik Şurasından öncə təqdim edilməsi gözlənilən Əlcəzair planına veto qoyacaq.
Linda Tomas-Qrinfild şənbə günü verdiyi açıqlamada ABŞ-ın Qəzza münaqişəsinin "dayanıqlı həlli" üzərində aylardır çalışdığını, bunun Qəzzaya ən azı altı həftə ərzində dərhal və davamlı sakitlik gətirəcəyini və daha sonra davamlı sülh qurmaq üçün addımlar atıla biləcəyini bildirib.
Səfirin sözlərinə görə, ABŞ-ın İsrail, Misir və digərlərinin töhfəsi ilə üzərində işlədiyi plan “bütün girovları ailələri ilə birləşdirmək və döyüşlərdə uzunmüddətli fasilə vermək üçün ən yaxşı fürsəti təmsil edir ki, bu da fələstinli mülki əhaliyə ehtiyac duyduqları həyat qurtaran qida, su, yanacaq, dərman və digər zəruri əşyaların çatdırılması imkanı verəcək.
Linda Tomas-Qrinfild Əlcəzair planının eyni nəticələrə nail olmayacağını və "onlara zidd ola biləcəyini" söylədi. ABŞ rəsmisi bildirib ki, Əlcəzair planı səsverməyə çıxarılarsa, "qəbul edilməyəcək".
Əl-Əqsa Şəhidləri Xəstəxanasının rəsmiləri CNN-ə bildiriblər ki, İsrail hava qüvvələrinin şənbə günü Qəzzanın mərkəzinə endirdiyi zərbələr nəticəsində azı 68 nəfər ölüb.
Ümumdünya Səhiyyə Təşkilatı və Qəzzanın Səhiyyə Nazirliyi Qəzzanın cənubundakı Xan Yunisdəki Nasser Xəstəxanasının işlək bir qurum olmadığını bildirib.
Nazirlik sözçüsü Əşrəf əl-Qidra bazar günü Reuters-ə bildirib ki, Nasser "tamamilə xidmətdən kənardadır". Onun sözlərinə görə, xəstələrə yalnız dörd işçi qulluq edir.
Qəzza nazirliyi bazar günü bildirib ki, HƏMAS-ın İsrailə hücumundan sonra İsrailin hücumları nəticəsində 28 985 fələstinli ölüb, 68 883 nəfər yaralanıb. Nazirlik son 24 saatda ən azı 127 fələstinlinin öldüyünü, 205 nəfərin yaralandığını bildirib. Fələstinlilərin əksəriyyəti qadın və uşaqlardır.
Forum