Accessibility links

Media: Taliban qızlara dövlət tibb institutlarına daxil olmağa icazə verib


Bildirildiyinə görə, Taliban Əfqanıstanda orta məktəbi bitirən qızlara mart ayında başlayacaq yeni tədris ili üçün dövlət tibb institutlarına daxil olmağa icazə verib.

Talibanın idarə etdiyi rəsmi Bəxtar xəbər agentliyi çərşənbə axşamı bildirib ki, Kabildəki İctimai Səhiyyə Nazirliyinin göstərişinə əsasən Əfqanıstanın ondan çox əyalətində qeydiyyat prosesi başlayıb. Əlavə məlumat verilməyib.

Əfqanıstan de-fakto rəsmilərindən nazirliyin bildirilən direktivi ilə bağlı hələ şərh verilməyib. Taliban 2021-ci ilin avqustunda Əfqanıstanda hakimiyyəti ələ keçirdikdən sonra qızların altıncı sinifdən sonra təhsil almasına qadağa qoyub və qadınların dövlət və özəl sektorda işləməsini yasaqlayıb.

Səhiyyə Nazirliyinin direktivi Talibanın hakimiyyəti ələ keçirməsindən əvvəl məzun olmuş qızlar üçün təhsillərini bərpa etmək və qadınların hələ də işləməsinə icazə verilən azsaylı sahələrdən biri olan səhiyyə sektorunda işləmək üçün rahatlıq əlaməti ola bilər.

Yardım qrupları deyir ki, qadınların təhsilinə və işinə qoyulan məhdudiyyətlər Əfqanıstanın onsuz da kövrək olan səhiyyə sektoruna zərər vurub. Belə ki, ölkədə bir ildən artıqdır ki, heç bir həkim yetişməyib.

Birləşmiş Millətlər Təşkilatı dəfələrlə xəbərdarlıq edib ki, Əfqanıstan ümumilikdə ixtisaslı və xüsusilə də qadınlar arasında tibb işçiləri çatışmazlığı ilə üzləşir.

BMT-nin Baş katibi Antonio Quterreş çərşənbə axşamı təkrarlayıb ki, Taliban qızların təhsil almasına və qadınların məşğulluğuna qoyulan qadağanı geri götürməlidir.

"Qadınlar və qızlar Əfqanıstan həyatının bütün aspektlərində tam və mənalı şəkildə iştirak edə bilməlidirlər - sinif otaqlarında oturacaqlardan qərarların qəbul edildiyi masalara qədər", Quterres əvvəllər Twitter kimi tanınan X-də yazıb.

O, bu bəyanatı Qətərdə 25 ölkənin, eləcə də Avropa İttifaqı, İslam Əməkdaşlıq Təşkilatı və Şanxay Əməkdaşlıq Təşkilatının nümayəndələrinin Əfqanıstanın de-fakto Taliban hakimiyyəti ilə əlaqəni müzakirə etdiyi beynəlxalq konfransa ev sahibliyi etdikdən bir gün sonra verib.

Quterreş Körfəz dövlətinin paytaxtı Dohada konfransın nəticələri barədə jurnalistlərə məlumat verərkən qızların təhsilinin vacibliyini vurğulayıb. O, üç qız nəvəsinin orta məktəbdə oxuya bilməməsi və universitetə daxil ola bilməməsinin onun üçün "ağılagəlməz" olacağını deyib.

“Mən istərdim ki, Əfqanıstandakı bütün nəvələr və qızlar mənim nəvələrimin mənim ölkəmdə istifadə edəcəyi hüquqlardan tam istifadə etsinlər” - deyə, baş katib bildirib.

Bu ay açıqladığı hesabatda Human Rights Watch xəbərdarlıq edib ki, xarici maliyyə və texniki inkişafın kəskin azalması Əfqanıstanın səhiyyə sisteminə ciddi ziyan vurub. ABŞ-da yerləşən təşkilat Talibanın qadınların məşğulluğuna ciddi məhdudiyyətlər qoymasının böhranı gücləndirdiyini deyib.

“Qadınların əksər dövlət işlərində, qeyri-hökumət təşkilatlarında və Birləşmiş Millətlər Təşkilatında işləməsinə, səhiyyə və təhsil sahələrində xüsusi vəzifələr istisna olmaqla, bəzi özəl sektorda işləməsi qadağan edilib” - deyə, hesabatda bildirilir.

Təşkilat qeyd edib ki, qadın və qızlara qoyulan məhdudiyyətlər onların səhiyyə xidmətlərinə çıxışına “ciddi şəkildə mane olub” və Əfqanıstanda gələcək qadın tibb işçilərinin demək olar ki, bütün təlimlərini əngəlləyib.

Forum

Amerika İcmalı

Amerika İcmalı. ABŞ-Yaponiya əlaqələri. ABŞ-ın Azərbaycan-Ermənistan sülh prosesində rolu.
please wait

No media source currently available

0:00 0:30:13 0:00
XS
SM
MD
LG