Accessibility links

Britaniyanın Baş naziri Rusiyanın aktivlərinin dondurulması üçün kəskin tədbirlər görməyə çağırıb


Böyük Britaniyanın baş naziri Rişi Sunak bazar günü Qərbi Rusiyanın aktivlərini müsadirə etmək üçün daha sərt tədbirlər görməyə çağırıb. O, həmçinin dondurulmuş vəsaitlərə artıq hesablanmış faizlərin Ukraynaya göndərilməsini istəyib.

Rusiyanın Ukraynaya genişmiqyaslı işğalının ikinci ildönümündə Sunak deyib ki, Qərb müttəfiqləri Vladimir Putinin “bizi sadəcə gözləyə biləcəyinə” inamını sarsıtmaq üçün Rusiyaya qarşı sanksiyalarla daha da irəli getməlidir.

Sunak The Sunday Times-da dərc olunan məqaləsində deyib: “Biz Rusiyanın yüz milyardlarla dondurulmuş aktivlərinin müsadirə edilməsində daha qətiyyətli olmalıyıq. Bu, bizim bu aktivlərə yığılan milyardlarla dollar faizləri müsadirə etməyimizdən və onları Ukraynaya yönəltməyimizdən başlamalıdır. Sonra biz G7 ilə birlikdə aktivləri müsadirə etmək və bu vəsaitləri Ukraynaya göndərmək üçün qanuni yollar tapmalıyıq”.

Böyük Britaniyanın Baş nazirinin açıqlaması şənbə günü G7 liderlərinin "Ukraynaya dəstək üçün dondurulmuş Rusiyanın suveren aktivlərindən istifadənin bütün mümkün yollarını" araşdırmağa söz verdikdən sonra verilib.

G7 ölkələrinin liderləri öz bəyanatlarında qeyd ediblər ki, istənilən hərəkət üzv ölkələrin qanunlarına və beynəlxalq hüquqa uyğun olmalıdır. G7 üzvləri təsdiqləyiblər ki, Rusiyanın onsuz da dondurulmuş aktivləri “Rusiya Ukraynaya vurduğu ziyanı ödəyənə qədər” dondurulmuş vəziyyətdə qalacaq.

G7 ölkələri ötən ay Aİ-nin Ukraynanın bərpasını maliyyələşdirmək üçün fondlardan əldə edilən mənfəətdən istifadəyə dair ilk addım barədə razılaşmasını alqışlayıb.

Dünya Bankı, Aİ, BMT və Ukrayna hökuməti daha əvvəl açıqlanan birgə hesabatda bildiriblər ki, Ukraynanın Rusiyanın işğalından sonra yenidənqurma xərclərini ödəmək üçün təxminən yarım trilyon dollara ehtiyacı var.

Ukraynanın baş naziri Denis Şmıqal bildirib ki, xərclərin böyük hissəsi müsadirə edilmiş Rusiya aktivləri hesabına ödənilməlidir. Kyiv istərdi ki, Qərb Ukraynanın yenidən qurulmasını maliyyələşdirmək üçün Rusiyanın dondurulmuş 300 milyard dollarlıq aktivlərini sərbəst buraxsın.

Forum

Amerika İcmalı

Amerika İcmalı. ABŞ-Yaponiya əlaqələri. ABŞ-ın Azərbaycan-Ermənistan sülh prosesində rolu.
please wait

No media source currently available

0:00 0:30:13 0:00
XS
SM
MD
LG