Pakistan rəsmilərinin bildirdiyinə görə, ölkənin sabiq baş naziri Benazir Bhuttonun sui-qəsdi ilə bağlı şübhəli bilinən bir yeniyetmə həbs edilib. Xəbər agentlikləri adının açıqlanmadığı təhlükəsizlik rəsmisinə istinadən bildirir ki, 15 yaşlı Eytizaz Şah cümə axşamı şimal-şərq şəhəri olan Dera İsmayıl Xanda ələ keçirilib. Verilən məlumata görə, o, Aşura günü ərəfəsi şiə məscidini partlatmağa hazırlaşdığı zaman saxlanılıb. Rəsmilər yeniyetmə gəncin xanım Bhuttonun sui-qəsdini təşkil edən 4 nəfərdən biri olduğunu etiraf etdiyini deyib. Benazir Bhutto dekabrın 27-də Ravalpindidə yürüşdən sonra qətlə yetirilmişdi. Taliban və Əl Qaidə-nin sözçüsü Məhəmməd Ömər yeniyetmə ilə əlaqələrini rədd edib və qrupun xanım Bhuttonun qətlində iştirak etmədiyini bildirib. Başqa bir xəbərdə isə dünəndən bəri Cənubi Vəziristanda 50 yaraqlının ələ keçirildiyi bildirilir.