Ötən prezident seçkilərindən
fərqli olaraq bu il Azərbaycanda keçirilən prezident seçkiləri Qərb mətbuatında
bir o qədər geniş işıqlandırılmayıb.
Bir çox ekspertlərin sönük dəyərləndirdiyi səsverməyə Washington
Post-da, New York Times qəzetlərinin bugünkü sayında yer ayrılıb. Post hazırkı prezident İlham Əliyevin
seçkiləri asanlıqla udduğunu vurğulayır.
Qəzetin yazdığına görə İlham Əliyevlə üzləşən 6 opponentin heç biri ona
ciddi rəqib hesab olunmurdu. Bu
rəqiblərin bir çoxu artiq erkən nəticələr daxil olmağa başlayırkən prezidenti
təbrik etməyə başladılar. Namizədlərdən
biri, İqbal Ağazadə səsvermənin hökumətlə müxalifət münasibətlərində yeni
səhifə açdığını bildirdi. Eyni zamanda
ölkənin aparıcı müxalifət partiyalarının seçkiləri baykot etdiyi
bildirilir. Müsavat partiyasının
başqanı İsa Qəmbərə istinad edən Post səsvermənin beynəlxalq standardlara uyğun
gəlmədyini yazır.International Herald Tribune
qəzeti ATƏT-in seçkiləri tənqid etməsini önə çəkir. Yazıda seçkilərdə 440 müşahidəçi ilə təmsil olunan ATƏT-in
mətbuat konfransına yer verilir.
Müşahidəçilər misiyasının rəhbəri Boris Frlets əhəmiyyətli irəliləyişin
olduğunu, eyni zamanda bütün öhdəliklərin yerinı yetirilmədiyini bəyan
edib. Monitorların mövqeyi budur ki,
seçkilərdə rəqabət və canlı siyasi debat cərəyan etməyib, və bu səsvermə
demokratik seçkilərin mənalı və pluralist prinsiplərini əks etdirmir. Səsvermə ilə bağlı ictimai əhval
ruhiyyəyə gəlirkən New York Times qəzetində əksər sakinlərin seçkilərlə
maraqlanmadığı qeyd olunur. Yazıda
bildirilir ki, son 3 il ərzində baş verən iqtisadi inkişaf nəticəsində
Azərbaycanın dövlət büdcəsi 12 dəfə artmış və iqtisadiyyatın həcmi 4 dəfə
genişlənmişdir. Dünyanın zəlzələdən və
başqa təbii fəlakətlərdən əzab çəkən bir sıra regionları ilə müqayisədə
Azərbaycan sabit görünür. Və bəzi
insanlar hiss edilən sabitliyi mücərrəd demokratiyadan üstün tuturlar. Yazı müəllifi ölkə paytaxtında iri tikinti
işlərinin getdiyini yazır. Onun
fikrincə Azərbaycanın hekayəsi Sovet istibdadından qurtulmuş başqa ölkələrin
hekayələrinə oxşardır. Sovet İttifaqı
dağılanda bir çoxları azadlığa və demokratik ideallara ümidlə baxırdılar. Lakin həmin vaxtdan 17 il ötmüş, bir
çoxlarının demokratiyaya münasibəti sinik xarakter alıb. Bakı küçələrində rəy sorğusu keçirən
müxbirin dediyinə görə fikri soruşulanların böyük əksəriyyəti seçkilərdə İlham
Əliyevin rəqiblərinin adlarını bilmirdilər.