Avropa Şurası Yerli və Regional İdarəetmə
Konqresinin prezidenti Yan Mikallef Azərbaycanda martın 18-də keçiriləcək
referendumun təxirə salınması barədə çağırışını bir daha təkrar edib. Konqres
prezidenti deyib ki, Venesiya Komissiyası konstitusiya dəyişiklikləri barədə öz
mövqeyini bildirərək xüsusilə 146-cı bəndə ediləcək dəyişikliklərdə yerli
özünüidarə barədə narahatlıqlarını izhar edib. Komissiya konqresin martın 2-də sərgilədiyi mövqeni
təsdiq edərək bunun Azərbaycanın 2002-ci ildə qəbul etdiyi Yerli Özünüidarə
barədə Avropa Xartiyasına cavab vermədiyini bildirib. Yan Mikallef komissiyanın
habelə digər əlavə və dəyişikliklərdən narahatlıq hissi keçirdiyini dilə
gətirib. Konqres prezidenti Azərbaycan baş naziri Artur Rəsizadəyə ikinci
məktubunda da 18 mart referendumunun təxirə salınmasına çağırıb. “Aydındır ki,
əlavə və dəyişikliklər Komissiyanın mövqeyi nəzərə alınmadan təsdiq edilsə,
Azərbaycan Avropa demokratiya standarlarına cavab verməyən konstitusiyası ilə
çətin vəziyyətə düşəcək”-deyə Yan Mikallef narahatlığını izhar edib.