Liviya 1989-cu ildə Fransa təyyarəsinə hücum zamanı həlak olmuş 170 adamın hər birinin ailəsinə bir milyon dollar məbləğində təzminat ödənilməsi haqda razılıq imzalayıb. Razılıq bu gün Parisdə imzalanıb. Fransa məhkəməsi 6 liviyalını qiyabi olaraq bomba hücumlarını həyata keçirməkdə ittiham etmişdir. Liviya hökuməti hücumun məsuliyyətini heç bir zaman özüərinə götürməyərək kompensasiya ödəməyə razı olmuşdur. Liviyalı həmkarı Əbd-ür-Rəhman Şalğamla danışıqlar keçirmiş Fransa xarici işlər naziri Dominik de Vipen razılığı alqışlamışdır. Fransa rəsmiləri Liviyanın razılığı imzalaması ilə iki ölkə arasında diplomatik əlaqələrin yeni səviyyəyə çatacağını bildirmişlər.