Bu gün daxili İşlər naziri Ramil
Usubovun "Sülh və Demokratiya" institutunun direktoru Leyla Yunusa qarşı
iddiası əsasında Nəsimi rayon məhkəməsində hazırlıq iclası başlayıb. Məhkəmə zalına ictimaiyyətin, diplomatik
korpusların, beynəlxalq təşkilatların çoxsaylı nümayəndələri və jurnalistlər olub.
Hakim Şahin Abdullayev ayaq üstə qalan insanların zalı boşaltmasını istəyib. Bu
zaman diplomatlar stullarını ayaq üstə qalmış insanlara verib və məhkəmə
icraçıları diplomatlarla üz-üzə qalıb. Vəziyyətin gərginliyini görən hakim
əlavə stullar gətirtdirib və iclas başlayıb. Beləliklə, prosesdə ABŞ, Fransa,
Almaniya, Norveç, Böyük Britaniya səfirliklərinin və ATƏT nümayəndələri də iştirak
edib.
Daxili İşlər naziri xanım Yunusu polisi təhqir etməkdə günahlandırır, təkzib
verməsini, üzr istəməsini və zərər müqabilində 100 min manat ödəməsini tələb
edir.
Nazirin nümayəndəsi Dableyka Quliyev ittihamın siyasi xarakter daşımadığını bildirir.
Vəkil Isaxan Aşurov məhkəmənin ilk öncə tərəfləri barışdırmaq təklifi ilə çıxış etməsini vacib sayır. Tərəflərin mövqeləri isə bir-birindən çox fərqlidir. Bu cənab Aşurov və Quliyevin dialoqundan da aydın görünür.
