Qarabağ üzrə Koordinasiya Şurası Azərbaycan,
Rusiya və Ermənistan prezidentlərinin noyabrın 2-də Moskvada Ermənistan-Azərbaycan
münaqişəsinin nizamlanması üzrə imzaladıqları bəyannamə ilə bağlı mətbuat
konfransı keçirib.
Qarabağ Azadlıq Təşkilatının sədri Akif Nağı bildirib
ki, Moskva bəyannaməsi Azərbaycanın maraqlarına ziddir. “Bu prosesə Rusiya
rəhbərlik edir. Belə ki, Rusiya bu münaqişəni yaradıb və münaqişədən
maraqlarının təmin edilməsi üçün istifadə edir. Rusiyanın əsas məqsədi
münaqişədən istifadə edərək regiona qoşunlarını yeritməkdir”.
Deputat Pənah Hüseynin fikrincə, Moskva bəyannaməsi
Azərbaycan ictimaiyyətində narahatlıq yaradıb. “Münaqişənin nizamlanması prosesində
beynəlxalq hüququn tələblərinə uyğun addımlar atılmazsa, ictimaiyyətin
narahatlığı daha da artacaq. Belə ki, bəyannaməni Minsk Qrupunun həmsədri olan
dövlətlərdən yalnız Rusiyanın imzalaması da Azərbaycanın maraqlarına uyğun
deyil. Münaqişənin nizamlanması prosesi bundan əvvəl olduğu kimi, beynəlxalq
formatda davam etdirilməlidir”.
Deputat həmçinin Azərbaycan prezidentinin son zamanlar
münaqişənin nizamlanması ilə bağlı ictimaiyyət tərəfindən dəstəklənən bəyanatlarından
geri çəkilməsinin də ciddi narahatlıq doğurduğunu deyib. “Dövlət başçısı son zamanlar
əvvəlki bəyanatlarından yalnız “ərazi bütövlüyü” sözünü işlədir. Moskva bəyannaməsində
isə ərazi bütövlüyü sözü də işlədilmir. Madrid prinsiplərindən bəhs edilir və
bu, Azərbaycanın mənafelərinin tam ziddinədir”.
“Turan” İnformasiya Agentliyinin direktoru Mehman
Əliyevin fikrincə, Moskva bəyannaməsi “dənizin dibindəki daşları” tam açıqlığı
ilə nümayiş etdirir. “Belə cəhdlər çox pis nəticələr verir. 90-cı illərdə belə
cəhdlər Ermənistan parlamentində güllələnmə, Azərbaycanda isə vəzifəli
şəxslərin istefası ilə nəticələndi”.
M.Əliyevin dediyinə görə, prezident Medvedevin Rusiyanın
Qafqazdan çəkilməyəcəyi barədə bəyanatı ciddi təhlükələrdən xəbər verir. “Son
Gürcüstan hadisələri, Rusiyanın Ukraynanı hədələməsi regionda münaqişələrin
qalmasının nə dərəcədə təhlükələrə yol açma ehtimallarını bir daha nümayiş
etdirir.
Bu səbəbdən də Azərbaycan münaqişənin nizamlanması üzrə
mövcud formatdan geri çəkilməməlidir. Bu il GUAM çərçivəsində münaqişələrin
BMT-də müzakirəsi var idi. Bu isə həll prosesində Avropa Birliyinin və GUAM
dövlətlərinin iştirakını zəruri edirdi. Bunun əleyhinə isə Rusiya və Ermənistan
çıxırdı. Moskva bəyannaməsi isə faktiki olaraq bu müzakirələri gündəlikdən
çıxardı”.
Konfliktoloq Arif Yunus bildirib ki, Moskva bəyannaməsi
ABŞ-ı münaqişənin nizamlanması prosesindən çıxarma məqsədi güdür. “Bu həm də
Rusiyanın mövqeyinin regionda gücləndirilməsi deməkdir. Təklif edilən Madrid
prinsipi isə Ermənistanın mənafeyinin müdafiəsidir. Çünki Madrid prinsipi
Dağlıq Qarabağda referendum keçirilməsinə söykənir. Bu isə qabaqcadan Qarabağın
itirilməsi deməkdir”.