ABŞ-ın Xəstəliklərə Nəzarət və Profilaktika Mərkəzinin (CDC) İmmunizasiya Komitəsi cümə günü "Johnson & Johnson"un COVID-19 peyvəndinin istifadəsinə tətbiq olunan fasilənin ləğvi məsələsini nəzərdən keçirmək üçün iclas keçirib.
Keçən həftə ABŞ-da peyvənd vurulmuş insanlarda nadir lakin təhlükəli qan laxtalanma halları aşkar edildikdən vaksindən istifadə müvəqqəti dayandırılıb.
Aprelin 13-də CDC və ABŞ-ın Ərzaq və Dərman İdarəsi birlikdə açıqlama yayaraq bildirib ki, mütəxəssislərə müəyyən edilən qan laxtalanması hallarını və ya hər hansı əlavə halların olub-olmadığını araşdırmağa imkan vermək məqsədi ilə peyvənddən istifadəyə fasilə verilməsi tövsiyə olunur.
CDC rəsmiləri "az sayda" olan halların araşdırıldığını desə də, bu hallar barədə geniş məlumat verməyib.
ABŞ-da tətbiq olunan 7 milyon doza arasında müəyyən edilmiş altı qan laxtalanması halı 18-48 yaş arası qadınlarda ortaya çıxmağa başlayıb.
Onlarda baş ağrıları başda olmaqla simptomlar 6 ilə 13 gün ərzində ortaya çıxıb. Mart ayında Virciniya ştatından olan bir qadın isə həyatını itirib.
Washington Post rəsmilərin fasiləni ləğv etməyə meylli olduqlarını bildirir.
Digər tərəfdən bu həftənin əvvəlində Avropanın dərmanlara nəzarət edən qurumu - Avropa Dərman Agentliyi - peyvəndlə nadir qan laxtaları arasında mümkün bir əlaqə tapdığını, lakin peyvəndin faydalarının risklərindən daha çox olduğunu bildirib.
Agentlik peyvəndin əlavə xəbərdarlıqla istifadəsini tövsiyə edəcəyini deyib.
