ABŞ-da səhiyyə ekspertlərindən ibarət müstəqil bir komitə Johnson & Johnson-un COVID-19 vaksini ilə bağlı yekun qərarını təxirə salıb. Onlar vaksinlə və onun nadir amma çox təhlükəli qan laxtalanması halları ilə əlaqəsi ilə bağlı daha çox məlumat toplamağa çalışırlar.
ABŞ-ın Xəstəliklərə Nəzarət və Profilaktika Mərkəzinin (CDC) vaksin tövsiyə komitəsi çərşənbə axşamı fövqəladə iclas keçirib. Bundan bir gün öncə isə CDC və Ərzaq və Dərman Administrasiyası 18 ilə 48 yaşları arasında altı qadında peyvənd vurulandan sonra 6-13 gün ərzində qan laxtalanması hallarının baş verməsinin ardınca bir dozalı vaksindən istifadənin müvəqqəti dayandırılmasını tövsiyyə edən birgə bəyanat yayıb. Həmin qadınlardan biri ölüb, biri isə kritik vəziyyətdə xəstəxanaya yerləşdirilib.
Bu altı hal Birləşmiş Ştatlarda Johnson & Johnson peyvəndi vurulan 7 milyon insan arasında baş verib.
Vaşinqton Universitetinin qlobal səhiyyə üzrə eksperti Dr. Bet Bell komitənin daha çox məlumat toplamağı dəstəkləyən üzvlərindən biridir. Lakin o, qan laxtalanması insidentlərini “çox nadir rast gəlinən hal” adlandırıb və israr edir ki, o, bu vaksinlə bağlı fundamental problemlərinin olduğuna dair mesaj vermək istəmir.
Lakin bu insidentlərin ardınca ABŞ-ın əczaçılıq nəhəngi çərşənbə axşamı peyvənd çatışmazlığı və logistika problemləri, habelə qan laxtalanması halları ilə əlaqəsi olan AstraZeneca vaskinindən istifadənin dayandırılması səbəbilə vaksinasiya səylərinin ləng irəliləyən Avropaya vaksin göndərməyi müvəqqəti olaraq dayandırıb.
Həm AstraZeneca həm də Johnson & Johnson vaksinləri adenovirusdan inkişaf etdirilib. Belə ki, onlar DNT-ləri insanda koronavirusu uzaq tutacaq immun sistemi yaradır.
AstraZeneca və Johnson & Johnson vaksinləri ilə problemlərin yaranmasının ardınca Avropa İttifaqı çərşənbə günü elan edib ki, ilin sonuna qədər göndəriləcəyi gözlənilər Pfizer vaksinin 50 milyon dozası iyunun sonunda ittifaqa çatdırılacaq.
