ABŞ-ın xüsusi nümayəndəsi Martin Qriffits Hudeyda limanı ətrafında və şəhərin özü ilə bağlı “mürəkkəb durum”u müzakirə etmək üçün Yəmən paytaxtı Sənadadır.
Husi üsyançları onların lideri Əbdül Məlik Əl-Husinin Qriffitslə görüşdüyünü bildirib. Onların Yəmənin beynəlxaq ictimaiyyət tərəfindən tanınan hökuməti ilə dekabr ayında danışıqlar zamanı əldə edilmiş sülh razılaşmalarının həyata keçirilməsi məsələsinin müzakirə etdiyi bildirilir.
Dekabr ayında İsveçdə keçirilən danışıqlar zamanı tərəflər Hudeydada atəşkəs və minlərlə müharibə əsirinin mübadiləsi də daxil olmaqla etibar yaradılması məqsədi ilə bir sıra tədbirlirin həyata keçirilməsi haqda razılıq əldə etmişdi. Lakin bu razılaşmaların həyata keçirilməsi prosesi ləng getməklə yanaşı, zorakılıqlarla müşayiət edilir.
Ərəb dünyasının ən yoxsul ölkəsi olan Yəmən İran tərəfindən dəstəklənən şiə qruplaşması olan Husi üsyançılarının paytaxt Sənanı 2014-cü ildə ələ keçirməsindən sonra vətəndaş müharibəsinə sürüklənib. Bundan bir il sonra Səudiyyə Ərəbistanının başçılığı ilə koalisiya münaqişəyə müdaxilə edib.
Müharibə ölkə iqtisadiyyatının çökməsi və əhalinin yarıdan çoxunun humanitar yardımdan asılı vəziyyətə düşməsinə gətirib çıxarıb.
Yəməndə münaqişə nəticəsində on minlərlə insan həyatını itirib. Ölkədə milyonlarla insan aclıq fəlakəti qarşısındadır. BMT ölkədəki vəziyyəti dünyada ən pis humanitar böhranlardan biri adlandırır.
