Amerika Birləşmiş Ştatları ikinci COVID-19 peyvəndini tətbiq etmək ərəfəsindədir.
Ərzaq və Dərman Administrasiyasının (Food and Drug Administration - FDA) tənzimləyicilərinin çərşənbə axşamı bildirdiyinə görə, Moderna və Milli Səhiyyə İnstitutu tərəfindən hazırlanmış peyvəndin ilkin təhlili onun təhlükəsiz və effektiv olduğunu təsdiqləyib.
Administrasiyanın təqdim etdiyi hesabatda klinik sınaqların son mərhələsində iştirak edən dörd könüllüdə üz əzələlərinin müvəqqəti iflici və ya zəifliyi kimi simptomlarla müşayiət olan Bell iflicinin müşahidə edildiyi açıqlanıb. Həmin iştirakçılardan üçünə peyvəndin özü, digərinə isə plasebo və ya peyvəndin saxta versiyası verilib.
İki dozalı peyvəndin təsdiqlənməsi prosesi hazırda Ərzaq və Dərman Administrasiyası və Peyvəndlər və Bioloji Məhsullar üzrə Komitənin səlahiyyətindədir. Komitə təsdiqini versə, FDA Moderna peyvəndinin təcili istifadəsi üçün icazə verəcək.
Ağ Ev sözçüsü Keyli Makenani çərşənbə axşamı jurnalistlərə bildirib ki, FDA tərəfindən təsdiqləndikdən sonra Moderna peyvəndinin 6 milyon dozası əhaliyə çatdırılmaq üçün gələn həftə göndərilməyə başlaya bilər. ABŞ-ın əczaçılıq şirkəti Pfizer və Almaniyanın BioNTech şirkəti tərəfindən birgə hazırlanan COVID-19 peyvəndinin ilk dozaları bu həftə ABŞ-da səhiyyə işçilərinə tətbiq edilib.
Moderna peyvəndi ilə bağlı son qərarından əvvəl isə Ərzaq və Dərman Administrasiyası Avstraliyada yerləşən səhiyyə texnologiyası şirkəti olan Ellume tərəfindən hazırlanan reseptsiz COVID-19 testinin tətbiqinə təcili razılıq verib. Evdə edilə bilən testin nəticələri smartphone tətbiqi vasitəsi ilə 15-20 dəqiqə ərzində bəlli olur.
