Avropa İttifaqı tənzimləyiciləri cümə günü Avropa qitəsində istifadə edilməsi nəzərdə tutluan üçüncü peyvənd - AstraZeneca-nı təsdiqləyib.
İttifaqın əhalisinə peyvənd vurmaq üçün kifayət qədər sürətlə hərəkət etmədiyinə dair tənqidlərin davam etdiyi bir vaxt, Avropa Dərman Agentliyinin (EMA) ekspert komitəsi, 55 yaşdan yuxarı insanlar üçün effektivliyi haqqında qeyri-kafi məlumatların olması narahatlığına baxmayaraq, yekdilliklə peyvəndi yetişkinlərə vurulmasını tövsiyə edib.
Agentliyin Amsterdamdakı qərargahında jurnalistlərə açıqlama verən EMA rəhbəri Emer Cooke bildirib ki, agentlik şərti və ya təcili istifadə üçün peyvəndi təsdiqləyib, çünki klinik sınaqlar vaksinin koronavirusla mübarizədə təxminən 60% təsirli olduğunu aşkarlayıb, baxmayaraq ki, əvvəl təsdiqlənmiş iki peyvən - Pfizer-BioNTech və Moderna daha yüksək - 90 faiz effektivlik göstərib.
Bir çox Aİ səhiyyə işçisi AstraZeneca peyvəndinin daha ucuz başa gəlməsi və Pfizer-BioNTech kimi olduqca soyuq anbarda saxlanmağa ehtiyac duymadığından təsdiqlənməsinin gözləndiyini bildirmişdi.
Cümə günü Almaniyanın Səhiyyə Naziri Yans Span peyvəndin təsdiqlənəcəyini, lakin 65 yaşdan yuxarı xəstələr üçün tövsiyə edilməyəcəyini bildirmişdi, çünki klinik sınaqlarda peyvəndin o yaş aralığında olan xəstələr üçün effektivliyi ilə bağlı məlumatlar yox idi.
AstraZeneca peyvəndi artıq Britaniyada və bir sıra digər ölkələrdə istifadə üçün təsdiqlənib. Lakin ABŞ Qida və Dərman İdarəsi şirkətin vaksinin təcili istifadə üçün müraciətini hələ də nəzərdən keçirir.
