Amerikada keçirilən prezident seçkiləri Azərbaycanda da izlənilib. Gecə saatları olmasına baxmayaraq ölkənin iqtidarda olan Yeni Azərbaycan Partiyasının rəhbərliyi istisna olmaqla aparıcı siyasi partiyaların, QHT-lərin rəhbərləri, hüquq-müdafiəçiləri, politoloqlar, ictimiyyətin çoxsaylı nümayəndələri seçkiləri izləmək üçün Bakıda Hyatt Regency hotelində bir araya gəlib.
ABŞ-ın Azərbaycandakı səfiri Robert Sekuta Amerika seçki demokratiyası və seçkilərdən sonra Azərbaycanla münasibətlər barədə danışıb.
"Biz ABŞ-da kimin prezident seçiləcəyini, yeni administrasiyanı kimlərin təmsil edəcəyini hələ bilmirik. Seçkinin nəticələri məlum olduqdan sonra belə yeni administrasiyanın xarici siyasətlə bağlı öz düşüncələri olacaq," o seçkilərdən sonra ABŞ administrasiyasının siyasətindən danışarkən deyib.
Səfir Sekuta bildirib ki, hətta nəticələr fərqli olsa belə, qanuna əsasən gələn il yanvarın 20-ə qədər Barak Obamanın rəhbərlik etdiyi administrasiya hakimiyyətdə qalacaq.
O, ABŞ-Azərbaycan münasibətlərinin seçkilərdən sonra necə olacağı ilə bağlı suala cavabda deyib ki, Vaşinqtonun Azərbaycana dair siyasətinin necə dəyişəcəyi haqda danışmaq hələ tezdir, seçkilərin nəticələrini gözləmək lazımdır.