Accessibility links

AXCP fəalının apellyasiya şikayətinə baxılır


Bu gün, iyunun 8-də Bakı Apellyasiya Məhkəməsində hakim Faiq Qasımovun sədrliyi ilə xuliqanlıq ittihamı ilə 3 il 6 ay həbsə məhkum edilmiş Azərbaycan Xalq Cəbhəsi Partiyasının (AXCP) fəalı Səid Məmmədzadənin (Bakuvi) apellyasiya şikayəti üzrə ilkin baxış olub. Məhkəmə baxışı iyunun 22-nə təyin edilib.

Məhkəmə iclas zalına pandemiya səbəbindən jurnalistlər buraxılmayıb.

Vəkil Elçin Sadıqov Amerikanın Səsinə bildirirb ki, müdafiə tərəfi apellyasiya baxışının məhkəmə istintaqı ilə keçirilməsi barədə vəsatət verib. Lakin vəsatət qəbul edilməyib.

AXCP fəalnını özü də cinayət işinin materiallarına əlavə olunmuş videogörüntünün məhkəmədə nümayiş etdirilməsini, araşdırılmasını istəyib. Onun sözlərinə görə, videodan da görünür ki, o, təqsirsizdir, zərərçəkmiş qismində tanınan Rüfət Məcidova nəinki xəsarət yetirməyib, ümumiyyətlə, onu vurmayıb.

Bu il, aprelin 28-də Bakının Xətai rayon Məhkəməsi hakim İbrahim İbrahimlinin sədrliyi ilə Səid Məmmədzadə barədə 3 il 6 ay həbs hökmü çıxarıb və fəal məhkəmə zalında həbsə alınıb.

AXCP fəalı barədə ötən il mayın 18-də Bakının Xətai rayon Məhkəməsi hakim Bəxtiyar Məmmədovun sədrliyi ilə 3 aylıq həbs-qətimkan tədbiri seçib.

O, Cinayət Məcəlləsinin 221.3 maddəsi (xuliqanlıq - silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) ilə günahlandırılır.

Daxili İşlər Nazirliyinin mətbuat xidməti bildirib ki, Səid Məmmədzadə maşınyuma yerində vətəndaşa bıçaq xəsarətləri yetirməkdə ittiham olunur.

Ötən ilin iyul ayının 20-də Xətai rayon Məhkəməsi Səid Məmmədzadə barəsində seçilmiş həbs-qətimkan tədbirinin ev dustaqlığı qətimkan tədbiri ilə əvəz olunması barədə qərar qəbul edib.

Səid Məmmədzadənin həbsi Facebook səhifəsində hökuməti və yüksək vəzifəli rəsmi şəxsləri kəskin tənqidindən sonraya təsadüf edir.

O, ittihamı qəbul etmir və məhkəmədə kiməsə xəsarət yetirmədiyini bildirib.

AXCP sədri Əli Kərimli bildirib ki, ölkənin adlı-sanlı idmançısı, mötəbər yarışlarda Azərbaycan bayrağını dəfələrlə ucaltmış Səid Bakuvinin həbsi siyasi sifarişdir.

Səid Məmmədzadə qarışıq döyüş növləri (MMA) üzrə Avropa çempionudur.

Şərhlərə bax

XS
SM
MD
LG