Accessibility links

AXCP Gənclər Komitəsinin sədri prokurorluqda dindirilib


Azərbaycan Xalq Cəbhəsi partiyasının Gənclər Komitəsinin sədri Emil Səlimov

Azərbaycan Xalq Cəbhəsi partiyasının Gənclər Komitəsinin sədri Emil Səlimov yanvarın 12-də Bakı vaxtı ilə 16-dan Baş Prokurorluğun ağır cinayətlər üzrə İstintaq İdarəsinə dəvət olunub.

Bu barədə Azərbaycan Xalq Cəbhəsi partiyası (AXCP)-dən Amerikanın Səsinə bildiriblər.

Partiyadan verilən məlumata görə Emil Səlimov AXCP sədri Əli Kərimlinin ictimai əsaslar üzrə mühafizəçisi, hazırda siyasi məhbus həyatı yaşayan Niyaməddin Əhmədovun işilə bağlı dindirilib.

Belə ki 5 saat dindirildikdən sonra istintaqçılar Emil Səlimovla birlikdə mənzilə baxış keçirilməsi üçün onun yaşadığı evə gediblər.

Partiya hesab edir ki, AXCP GK-nin sədrinin həbsinə hazırlıq gedir.

Hələlik bu deyilənlərlə bağlı rəsmi qurumlar və hüquq-mühafizə orqanları rəsmi açıqlama yaymayıb.

Xatırlatma

Niyaməddin Əhmədov 2020-ci il aprelin 16-da Xətai Rayon Məhkəməsinin qərarı ilə İnzibati Xətalar Məcəlləsinin 211-ci (karantin qaydalarını pozma) və 535-ci (polisin qanuni tələbinə tabe olmamaq) maddələri üzrə inzibati qaydada 30 sutka müddətinə həbs olunub.

AXCP-nin məlumatına görə, aprelin 28-də fəal saxlanıldığı Daxili İşlər Nazirliyinin İnzibati Həbs Olunanların Saxlanma Məntəqəsindən başına torba salınaraq naməlum ünvana aparılıb və ağır işgəncələrə məruz qoyulub.

Öz növbəsində Daxili İşlər Nazirliyinin mətbuat xidmətinin rəhbəri Ehsan Zahidov AXCP-nin məlumatında deyilənləri təkzib edib. Onun sözlərinə görə, məlumat "uydurma xarakterlidir".

Mayın 16-da inzibati həbs müddəti başa çatdıqdan sonra Niyaməddin Əhmədova qarşı Cinayət Məcəlləsinin 214-1-ci (terrorçuluğu maliyyələşdirmə) maddəsi ilə təqsirləndirilən şəxs qismində cəlb edilərək məhkəmənin qərarı ilə həbs qətimkan tədbiri seçilib.

Baş Prokurorluq və Dövlət Təhlükəsizliyi Xidmətinin birgə məlumatına görə, Qabil Məmmədov adlı şəxsin Almaniya ərazisində sığınacaq alaraq Azərbaycan ərazisində terrorçuluğa hazırlıq və terrorçuluğa açıq çağırışlar etməsinə əsaslı şübhələr müəyyən edilib.

Məlumata görə, "Məmmədovun hakimiyyətə qarşı cinayət əməllərində dəstəklənməsinə etibar etdiyi şəxslərə, o cümlədən yaxından tanıdığı həmyerlisi Niyaməddin Əhmədova müxtəlif üsullarla göndərdiyi pul vəsaitlərini verməsinə, sonuncunun isə öz növbəsində terrorçuluğun maliyyələşdirilməsində istifadə olunacağını bilib həmin pul vəsaitlərini qəbul edərək uydurma ünvanlar adı altında qəsdən toplamaqla terrorçuluğun maliyyələşdirilməsi cinayətini törətməsinə əsaslı şübhələr müəyyən edilib. Lakin Qabil Məmmədovun çıxışlarında bəyan etdiyi terrorçuluğun törədilməsinə yönələn cinayət əməlləri iradəsindən asılı olmayan səbəblərdən başa çatdırılmayıb,” məlumatda deyilir.

AXCP fəalının həbsi prezident İlham Əliyevin müxalifəti kəskin tənqidlərindən sonraya təsadüf edib.

AXCP sədri Əli Kərimli bildirib ki, Niyaməddin Əhmədovun terrorçuluğun maliyyələşdirilməsi kimi "ağır, gözlənilməz cinayətdə ittihamı sadəcə absurdun dibi deyil, müxalifəti düşmən elan etməyin nəticəsidir".

Ötən il noyabrın 19-da Bakının Nəsimi rayon Məhkəməsi Niyaməddin Əhmədovun barəsində seçilmiş həbs qətimklan tədbirinin müddətini 2021-ci il aprelin 23-dək daha beş ay uzadıb.

Şərhlərə bax

XS
SM
MD
LG