Accessibility links

Azərbaycan-Gürcüstan sərhədində insident baş verib


Azərbaycan-Gürcüstan sərhədində insident

Gürcüstanın Daxili İşlər Nazirliyi Azərbaycanla sərhəddə "Keşikçidağ/David Qareci" monastr kompleksində baş vermiş insident faktını tanıyıb.

Gürcüstan Daxili İşlər Nazirliyinin ictimaiyyəti, vətəndaş qruplarını "Gürcüstan və Azərbaycan arasında sərhəddin delimitasiyası üzrə komissiyanın sakit şəraitdə işini davam etdirməsinə imkan verilməsinə" çağırıb.

Azərbaycan-Gürcüstan sərhədində insident
Azərbaycan-Gürcüstan sərhədində insident

Daxili İşlər Nazirliyi bəyan edib ki, David-Qareci ərazisində "Gürcüstanla Azərbaycan sərhəddində yerli sakinlərlə azərbaycanlı sərhədçilər arasında kiçik insident baş verib. "Lakin vəziyyət vaxtında yoluna qoyulub və hazırda hadisə yerində sakitlikdir."

Nazirliyin məlumatına görə, faktın öyrənilməsinə başlanılıb.

"Biz ictimaiyyəti, vətəndaş qruplarını delimitasiya üzə komissiyanın işini sakit şəraitdə davam etdirməsinə imkan verilməsinə çağırırıq ki, vaxtında razılaşma əldə olunsun" , nazirlik bildirib.

Azərbaycan-Gürcüstan sərhədi
Azərbaycan-Gürcüstan sərhədi

Qeyd edək ki, ötən gün Gürcüstan saytlarında sərhəddə Gürcüstan vətəndaşları ilə Azərbaycan sərhədçiləri arasındakı insidentlə bağlı video yayılıb.

Videoda görünür ki, bir qrup mülki şəxs iki azərbaycanlı sərhədçilərə hücum edərək onları təhqir edir, ərazini tərk etmələrini tələb edir.

Öz növbəsində Azərbaycan Dövlət Sərhəd Xidmətinin Mətbuat Mərkəzi bildirir ki, iyulun 14-də Dövlət Sərhəd Xidmətinin Sərhəd Qoşunlarının “Şəmkir” sərhəd dəstəsinin “Keşikçi qala” sərhəd zasta­va­sının xidməti ərazisində Gürcüstan vətəndaşları tərəfindən Azər­bay­can sər­həd naryadına qarşı insident törədilib.

Keşikçidağ mağara-kilsə kompleksi
Keşikçidağ mağara-kilsə kompleksi

“Hadisə ilə əlaqədar təxirəsalınmaz tədbirlər görülməklə insident qı­sa müddət ərzində aradan qaldırılıb və Dövlət Sərhəd Xidmətinin şəxsi heyəti tərə­findən ərazidə təhlükə­sizlik tədbirləri təmin edilib. Azərbaycan və Gürcüstan sərhəd nümayəndələri arasında görüş keçirilib, baş vermiş hadisə birgə araşdırılıb, gələcəkdə bu ki­mi hal­la­ra yol verilməməsi üçün görülməli olan tədbirlər müzakirə edil­ib," Mətbuat Mərzkəzi bildirir.

Həmçinin Gürcüsan vətəndaşlarının Azərbaycan sərhədini pozması ilə bağlı Gürcüstanın Azərbaycandakı səfiri Xarici İşlər Nazirliyinə çağırılıb.

Bu cür hərəkətlərə yol verilməsi Azərbaycan və Gürcüstan arasında mövcud olan strateji tərəfdaşlıq münasibətlərinin ruhuna tamamilə ziddir və bunu iki ölkə arasında qarşıdurmaya yönəlmiş təxribat kimi qiymətləndiririk.
Azərbaycan Xarici İşlər Nazirliyi

Azərbaycan Xarici İşlər Nazirliyinin mətbuat xidməti bildirir ki, Gürcüstandan olan bir qrup şəxsin Azərbaycan istiqamətində dövlət sərhədini pozaraq Azərbaycan ərazisində yerləşən Keşikçidağ mağaralar kompleksi yaxınlığında xidmət aparan sərhəd naryadına hücum etməsi və onları nalayiq ifadələrlə təhqir etməsi ilə bağlı Gürcüstanın Azərbaycandakı səfiri Xarici İşlər Nazirliyinə çağırılıb və məsələ ilə bağlı müvafiq izahat istənilib.

“Təəssüf hissi ilə qeyd edirik ki, bu cür hərəkətlərə yol verilməsi Azərbaycan və Gürcüstan arasında mövcud olan strateji tərəfdaşlıq münasibətlərinin ruhuna tamamilə ziddir və bunu iki ölkə arasında qarşıdurmaya yönəlmiş təxribat kimi qiymətləndiririk.

Xarici İşlər Nazirliyi
Xarici İşlər Nazirliyi

Azərbaycan Xarici İşlər Nazirliyi bu insidentin araşdırılaraq müvafiq tədbirlərin görülməsi və görülmüş işlərə dair Xarici İşlər Nazirliyinin məlumatlandırılmasını qarşı tərəfdən tələb edib,” məlumatda qeyd edilir.

"Keşikçidağ" kompleksi məbəd, keşikçi qülləsi, sərhəd boyunca 25 kilometr məsafədə təbii və süni mağaralardan ibarətdir.

Kompleksin bir hissəsi Azərbaycan, digər hissəsi Gürcüstan tərəfinə düşür.

Azərbaycan və Gürcüstan arasında sərhəd SSRİ dövründə müəyyən olunub. Hər iki ölkənin müstəqilliyi əldə olunduqdan sonra Azərbaycan ilə Gürcüstan arasında dövlət sərhədinin delimitasiyası və demarkasiyası üzrə müvafiq dövlət komissiyaları yaradılıb və indiyədək komissiyaların 11 iclası keçirilib. Bu proses çərçivəsində 480 kilometrlik Azərbaycan - Gürcüstan dövlət sərhədinin əksər hissəsinin delimitasiyasına dair komissiyalar səviyyəsində razılıq əldə edilib. Hazırda 166 kilometrlik hissələr üzrə ekspertlər səviyyəsində iş davam etdirilir.

​Son aylar Gürcüstandan bir qrup insan "Keşikçidağ" mağara-kilsə kompleksi ilə bağlı iddialar irəli sürüb, sərhəd ərazisinə gələrək gərginlik yaratmağa cəhd edib.

Azərbaycan "Keşikçidağ" mağara-kilsə kompleksindəki tarixi abidələri dövlət səviyyəsində qoruma altına alıb. Bu məqsədlə hələ 2007-ci ildə "Keşikçidağ" Dövlət Tarix-Mədəniyyət Qoruğu yaradılıb. Qoruq ərazisində 70-dək mağara, 1 qala, 2 məbəd və 1 inanc yeri var.

XS
SM
MD
LG