Accessibility links

Bələdiyyə seçkilərinin ilkin nəticələri - müxtəlif baxışlar


Bələdiyyə seçkiləri

İqtidar və MSK seçkilərin demokratikliyindən, müxalifət və müstəqil ekspertlər qanun pozuntularından danışır

Dekabrın 23-də Azərbaycanda bələdiyyə seçkiləri keçirilib. Seçkilərin elan edilmiş ilkin nəticələrinə görə, bir neçə gənc ictimai fəal bələdiyyə üzvü seçilmək üçün yetərincə səs toplayıb. Bununla yanaşı, rəsmi məlumata görə daha çox səs toplayanların böyük əksəriyyəti iqtidarda olan Yeni Azərbaycan Partiyasının üzvləri və bitərəflərdir.

Bələdiyyə seçkisi
Bələdiyyə seçkisi

Mərkəzi Seçki Komissiyası səsvermənin azad və ədalətli mühitdə keçirildiyini bəyan etsə də aparıcı müxalifət qurumları və bir sıra müstəqil ekspertlər səsvermə zamanı çoxsaylı qanun pozuntularının müşahidə edildiyini bildirir. Bələdiyyə seçkilərində favorit hesab edilən bloger Mehman Hüseynovun adı isə çox səs toplayanlar siyahısında yoxdur. O, seçkilərdə qalib olduğunu bildirir.

Mehman Hüseynov seçki protokollarını təqdim edir
Mehman Hüseynov seçki protokollarını təqdim edir

Mehman Hüseynov: Qəsəbə bələdiyyəsinə üzv seçilməyimdən belə qorxurlar

Mehman Hüseynov 31 saylı Suraxanı ikinci seçki dairəsindən Qaraçuxur bələdiyyəsinə üzvlüyə namizəd idi. Onun qalib gələcəyi sosial şəbəkələri zəbt etmişdi. Hətta bəzi məntəqələrdə səslərin əksəriyyətini aldığı bildirilirdi.

Buna baxmayaraq Mərkəzi Seçki Komissiyasının rəsmi internet saytında onun adı qaliblər sırasında yoxdur.

Ülvi Həsənli
Ülvi Həsənli

Mehman Hüseynoun səlahiyyətli nümayəndəsi Ülvi Həsənli Amerikanın Səsinə müsahibəsində deyib ki, onun qaliblər sırasında olmamasının səbəbi çoxsaylı seçki saxtakarlığının olması ilə bağlıdır.

Ülvi Həsənli: Mehman Hüseynovun səslərini qorumaq üçün qanuni prosedurlardan istifadə edəcəyik
please wait

No media source currently available

0:00 0:03:17 0:00

Onun sözlərinə görə, seçki saxtakarlığı ilə bağlı çoxsaylı video faktları var.

“Biz əvvəlcə Dairə Seçki Komissiyasına, sonra Mərkəzi Seçki Komissiyasına şikayət edəcəyik. Bu instansiyalarda şikayətlərimiz təmin edilməsə, məhkəməyə və nəhayət Avropa İnsan Hüquqları Məhkəməsinə müraciət edəcəyik. Konstitusiyanın və qanunlarımızın imkan verdiyi səviyyədə aksiyalar da keçirməyi planlaşdırırıq,” o, Amerikanın Səsinə deyib.

Mehman Hüseynov bu gün psixi yorğunluğu ilə bağlı həkimə də müraciət edib.

O, Facebook səhifəsində yazıb ki, dekabr ayı onun üçün xüsusi bir aydır.

Çox xoşbəxtəm ki, gözəl vətəndaşlarımızla, dostlarımızla ünsiyyətdə oldum. Həm də, dostlar, düşünürəm ki, mənə böyük bir alqış da düşür. Mən bir daha bunların əsl mahiyyətini göstərdim. Niyə belə çıxılmaz vəziyətə düşüblər?
Mehman Hüseynov, bələdiyyə üzvlüyünə namizəd

“Düz bir il bundan əvvəl həbsxanada mənə qarşı haqsızlıq olunmuşdu və nəticədə Azərbaycan xalqının fəaliyyətinə, birliyinə nail olduq. Xalq 19 yanvar mitinqində öz sözünü dedi. Bu il tarix təkrarlanır, yenə mənə qarşı haqsızlıq ediblər. Bu dəfə də biz yaxşı iş gördük, Azərbaycan xalqını hərəkətə gətirə bildik. Düşünürəm ki, seçki ərəfəsi olan kampaniyamız hamını təəcübləndirdi, hamıda seçkilərə maraq oyatdıq, hamıya müsbət pozitiv enerji verdik. Bu bizim uğurumuzdur. Təəsüflənmirəm, əksinə çox xoşbəxtəm ki, gözəl vətəndaşlarımızla, dostlarımızla ünsiyyətdə oldum. Həm də, dostlar, düşünürəm ki, mənə böyük bir alqış da düşür. Mən bir daha bunların əsl mahiyyətini göstərdim. Niyə belə çıxılmaz vəziyətə düşüblər? Ay camaat, təsəvvür edin bir qəsəbə bələdiyyəsinə üzv seçilməyimdən belə qorxurlar. Bir daha təkrarlayıram, qəsəbə bələdiyyəsinə. Mən bu saxtakarlığın başında oturanları qınamıram, onlardan incimirəm, çünki onların qorxu hissini başa düşürəm. Bilirlər ki, Mehman olan yerdə haqsızlıq, özbaşınalıq, rüşvətxorluq ola bilməz. Bilirdilər ki, Mehman bələdiyyəyə seçilsə, onlar üçün daha ciddi problem olacaq, bilirdilər ki, onlar mənimlə baş-başa gələ bilməzlər, çünki rüşvətxor məmurların tərəfində yox, xalqın tərəfində olacaqdım. Dünən bizim ərazimizdə Qaraçuxur-Yeni Günəşlidə həqiqətən də bayram abu-havası idi. Seçici fəallığı möhtəşəm idi. Təsəvvür edin, bütün məntəqələrdə mən qalib olmuşdum. MSK ömür boyu belə seçki nəticəsi görməmişdi. Axırda məcbur olub biabırçı şəkildə seçkiləri saxtalaşdırdılar,” o qeyd edib.

Bloger fotoda əlində tutduğu seçki protokollarını göstərərək, Mərkəzi Seçki Komissiyasının sədri Məzahir Pənahova sual ünvanlayır: “Mən bu yekun protokolları nə edim bəs? Burada yazılan rəqəmlər onu göstərir ki, mən qalib olmuşam, siz isə deyirsiniz ki, Mehmanın səsi yetərincə deyil. Elə bildiniz ki, Mehmanı seçməməklə bütün probleminiz həll olundu? Təhlükə sovuşdu? Xeyr! Kreativ etiraz aksiyaları ilə gələcəyik. Əsl tamaşa bax bundan sonra başlayır. Hüquqi müstəvidə də mübarizəmiz başlayır, artıq şikayətlərin hazırlanması, faktların toplanması prosesinə başlamışıq,” o qeyd edib.

Anar Məmmədli
Anar Məmmədli

Anar Məmmədli: Bələdiyyə seçkilərində icmalaşma baxımından gözəl imkanı itirdik

“Dünən bir daha əmin oldum ki, bu ölkədə çoxlarının tanımadığı gizli qəhrəmanlar var və onların bir çoxu sosial mediada populyar deyil. Yalnız ona üzülürəm ki, bu bələdiyyə seçkiləri yerli səviyyəli təşəbbüslər üçün ictimai təşkilatlanma (grassroots) və icmalaşma baxımından gözəl fürsətə çevrilmədi, bu imkanı hələlik itirdik.” Bu barədə Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli bildirib.

Onun fikrincə, dekabrın 23-də keçirilən bələdiyyə seçkiləri müstəqil və müxalif namizədlərin az sayda iştirakı səbəbindən milli siyasi hadisəyə çevrilməyib.

Onadək namizədin verdiyi töhfə nəticəsində bələdiyyə seçkiləri 2009-cu ildən sonra ilk dəfə maraq kəsb etdi və bir müddət siyasi müzakirə mövzusu oldu.
Anar Məmmədli, seçki eksperti


“Amma 10-dək namizədin verdiyi töhfə nəticəsində bələdiyyə seçkiləri 2009-cu ildən sonra ilk dəfə maraq kəsb etdi və bir müddət siyasi müzakirə mövzusu oldu. Prosesin belə bir çalar qazanmasına töhfə verən hər bir namizədi alqışlayır, seçilib-seçilməməsindən asılı olmayaraq onları qalib hesab edirəm. Dünənki gecənin gizli qəhramanları da var. Onlar Naxçıvandan tutmuş Gəncəyə, Lerikədək, Xudatdan Lənkərana, Ağdama, Göyçaya, Bərdəyədək müxtəlif seçki dairələrində prosesi izləyən müşahidəçilərdir,” Anar Məmmədli qeyd edib.

Ekspert şəxsi müşahidələrinə əsaslanaraq bildirir ki, Gəncə, Lənkəran, Bərdə və Mərkəzi Aran rayonlarında ictimai işlərə böyük həvəs var.

Seçkilərin Monitorinqi və Demokratiyanın Tədrisi Mərkəzinin infoqrafik nəticələri
Seçkilərin Monitorinqi və Demokratiyanın Tədrisi Mərkəzinin infoqrafik nəticələri

“Bakıdakı ictimai fəallıq və könüllülük bu bölgələrdən geri qalır. Çünki seçki dairələrinin sayına və əhalinin çoxluğuna rəğmən Bakıda könüllü ictimai fəallıq, o cümlədən müşahidəçilik zəifdir. Bloqer və jurnalistlərin daha çox Bakıda işləməsi səbəbindən seçki günü buradan verilən reportajlar sizi yanıltmasın. Əslində ictimai fəallıq dəfələrlə yüksək olmalı bölgə Bakıdır. Nəhayət, dünən 2005-ci ildən sonra ilk dəfə bir seçki məntəqəsində seçici iradəsinin şahidi oldum. Beyləqanın Təzəkənd bələdiyyəsinə səsvermə bitəndən sonra müşahidəçilər səslərin şəffaf sayılmasını tələb ediblər. Məntəqə Seçki Komissiyasının üzvləri onlara məhəl qoymayıb və müşahidəçiləri kənarlaşdırıb. Buna etiraz edən kənd sakinləri məntəqənin qarşısında toplaşıb, Məntəqə Seçki Komissiyasının üzvlərini səsləri yenidən saymağa məcbur edib, uzun müddət onları bayıra buraxmayıblar. Və səsləri yenidən saydırıblar,” ekspert yazıb.

Cəmil Həsənli
Cəmil Həsənli

Cəmil Həsənli: Hakimiyyət meydanların xofunu yaşamasa heç bir seçki olmayacaq

Milli Şuranın sədri Cəmil Həsənli bildirir ki, 15 min bələdiyyə üzvü yerinə 2 müstəqil namizədin keçməsini uğur hekayəsi kimi təqdim edirlər.

"Biz deyəndə ki, bu ölkədə seçki deyilən bir şey yoxdur, İlham Əliyev bütövlükdə seçki institutunu məhv edib, qarşımıza gülünc dəlillər qoyurdular. Seçkini biz boykot etmirik, xalq boykot edir. Dünən ölkədə seçici fəallığı 5-6 faizin ətrafında idi. Kiçik istisnalarla çox az məntəqə və dairələrdə bu 10 faizin aşağısına gedib çıxıb. Əgər 1550 nəfər seçicisi olan məntəqədə orta hesabla 78 nəfərlə 138 nəfər arasında seçici seçkiyə qatılıbsa (içində karusel olmaqla), qutuya bülleten atıbsa, bunun adı boykot deyil, bəs nədir? Hətta MSK-nın rəsmi saxta məlumatlarından aydın olur ki, ümumilikdə seçicilərin sayının artmasına baxmayaraq, 2014-cü ilin bələdiyyə seçkiləri ilə müqayisədə seçici fəallığı 38,9 faizdən 32,7 faizə enib, yəni aşağı-yuxarı 6 faiz azalıb.

Axı, niyə özünüzü yorursunuz, niyə özünüzü aldadırsınız: 16 il ərzində İlham Əliyev yarımazad ölkədən qeyri-azad ölkəyə çevirdiyi məmləkətdə ədalətli seçki keçirəcək?
Cəmil Həsənli, Milli Şuranın sədri

Bələdiyyə üzvü seçilənlərin 99,99 faizindən çoxunun siyahısı seçkidən əvvəl icra hakimiyyətlərində hazır olub. Dekabrın 23-də yuxarıdan aşağı və ya əksinə, çeşidli seçki komissiyalarının işi artıq hazır olan bu siyahıları rəsmiləşdirmək olub. Gördünüz ki, Həbib Müntəzirin seçkidən əvvəl açıqladığı siyahılarla Məzahir Pənahovun seçkidən sonra açıqladığı siyahılar demək olar ki, üst-üstə düşdü. Hələ sadəlövhcəsinə MSK-dan Mehman Hüseynovun məsələsinə aydınlıq gətirəcəyini gözləyənlər də var idi. Məzahir müəllim onları intizarda qoymadı. Bəyan etdi ki, Corc Qafqarov Mehman Hüseynovdan çox səs toplayıb.

Axı, niyə özünüzü yorursunuz, niyə özünüzü aldadırsınız: 16 il ərzində İlham Əliyev yarımazad ölkədən qeyri-azad ölkəyə çevirdiyi məmləkətdə ədalətli seçki keçirəcək? Bu hakimiyyət xalqı qarşısında güc kimi görməsə, bu gücü etiraf etməsə, xalqın iradəsi ilə hesablaşmaq məcburiyyəti qarşısında qalmasa, meydanların xofunu yaşamasa heç bir seçki olmayacaq. Buna arxayın ola bilərsiniz!" Cəmil Həsənli Facebook səhifəsində qeyd edib.

Əli Əhmədov
Əli Əhmədov

Əli Əhmədov: YAP-ın bələdiyyə seçkilərində namizədləri seçicilərin çoxunun dəstəyini qazanıb

Yeni Azərbaycan Partiyası (YAP) sədrinin müavini Əli Əhmədov seçkilərin demokratik və azad mühitdə keçirildiyini bildirib.

“Bizim seçki məntəqələrində olan müşahidəçilərimizin apardığı müşahidələrə əsasən qeyd edə bilərəm ki, YAP-ın bələdiyyə seçkilərində namizədləri seçicilərin çoxunun dəstəyini qazanıb. İnsanların rifahının yaxşılaşması ilə əlaqədar prezident İlham Əliyevin təşəbbüsü ilə böyük sosial layihələrin həyata keçirilməsi insanlar tərəfindən yüksək qiymətləndirilir,” o qeyd edib.

Əli Kərimli
Əli Kərimli

Əli Kərimli: Bələdiyyə seçkiləri parlament seçkilərinin son məşqi idi

AXCP sədri Əli Kərimli hesab edir ki, iqtidar daha bir seçkini “oğurlayıb”.

Parlament seçkiləri də belə keçiriləcək.
Əli Kərimli, AXCP sədri


“Bələdiyyə seçkiləri 9 fevral parlament seçkilərinin son məşqi idi. Parlament seçkiləri də belə keçiriləcək. Rejim tərəfindən 15 min nəfər üzv təyin olunmuş bələdiyyə məclislərində 5 -10 nəfər müstəqil şəxsin də olması ümumi mənzərəni dəyişmir. 2 nəfər icra başçısının rüşvətlə həbsi korrupsiya ilə mübarizə deyil. Əvvəllər də belə hallar olub. Ancaq korrupsioner rejimin mahiyyəti dəyişməyib,” AXCP lideri qeyd edib.

Tofiq Yaqublu
Tofiq Yaqublu

Tofiq Yaqublu: Bələdiyyə seçkiləri total saxtakarlıq şəraitində keçib

Milli Şuranın və Müsavat Partiyasının üzvü Tofiq Yaqublu bildirir ki, bir neçə gənc ictimai fəalın göstərdiyi fədakarlığa və əldə etdiyi nəticələrə rəğmən, bələdiyyə seçkiləri gözlənildiyi kimi total saxtakarlıq şəraitində keçib.

Ötən gün keçirilmiş bələdiyyə seçkilərində əldə edilmiş mikroskopik nəticələri əlində bayraq edərək boykot etdiyimiz növbədənkənar parlament seçkiləri ilə bağlı ibrətamiz məsləhətlər verməyə tələsməyin.
Tofiq Yaqublu, siyasətçi


“Ölkə üzrə 15 mindən çox bələdiyyə üzvü yerindən 4-5 yer qazanılmasından bəziləri eyforiyaya qapılaraq yanlış nəticələr çıxardıblar. Dostlar, seçkilərdə qələbə müxalifətə ona görə lazımdır ki, ölkəmizin idarə olunmasına sahib olaq, bu cinayətkar rejim tərəfdən vurulmuş yaralarını sağaldaq. Bələdiyyə seçkiləri bu problemin həlli üçün hətta formal hüquqi şans da deyil. Ona görə də hakimiyyətin taleyi həll olunduğu prezident və parlament seçkilərini İlham Əliyevi qətiyyən maraqlandırmayan və ona görə də rayon icra hakimiyyətlərinin öhdəsinə buraxdığı bələdiyyə seçkiləri ilə eyniləşdirməyin. Üstəlik də, ötən gün keçirilmiş bələdiyyə seçkilərində əldə edilmiş mikroskopik nəticələri əlində bayraq edərək boykot etdiyimiz növbədənkənar parlament seçkiləri ilə bağlı ibrətamiz məsləhətlər verməyə tələsməyin. Nəzərə alın ki, biz demokratik müxalifət olaraq əvvəllər qatıldığımız prezident və parlament seçkilərində indiki bələdiyyə seçkilərində fərqlənmiş gənclərdən müqayisəyə gəlməz dərəcədə artıq təşkilati, təbliğati iş görüb və fədakarlıq edib bu rejimə qalib gələ bilmişik, lakin qələbəmizi rəsmiləşdirməyə gücümüz yetməyib. Çünki həmin qələbənin tanınması rejimin süqutu demək idi. Təsəvvür edin ki, bütün cəhdlərinizə rəğmən sizə meşədən odun gətirməyə icazə vermirlər, amma bir başqası gedib meşədən çiçək yığıb gətirir və bunu görən bəzi məsləhətbazlar deyirlər ki, bəs deyirdiniz meşəbəyi heç kəsə meşədən bir çöp çıxartmağa da imkan vermir. Fevralın 10-na bir şey qalmadı, görəcəyik...” o qeyd edib.

Qubad İbadoğlu
Qubad İbadoğlu

Qubad İbadoğlu: Saxta seçkiilər üçün 65,2 milyon manat israf olunub

Demokratiya və Rifah Hərəkatının rəhbəri Qubad İbadoğlu bildirir ki, “saxta seçkiilər üçün 65,2 milyon manat israf olunub.”

“Bu vəsait bələdiyyələrin illik büdcəsindən 2,5 dəfə, gələn il doğulan bütün uşaqlara veriləcək birdəfəlik yardımın ümumi məbləğindən 4,5 dəfə çoxdur. Yəni həmin vəsaiti xərcləməyib uşaq puluna yönəltsəydik, hər bir yeni doğulan uşağa 200 manat deyil, 900 manat ödəmək mümkün olardı.

Bu vəsait bələdiyyələrin illik büdcəsindən 2,5 dəfə, gələn il doğulan bütün uşaqlara veriləcək birdəfəlik yardımın ümumi məbləğindən 4,5 dəfə çoxdur.
Qubad İbadoğlu, Demokratiya və Rifah Hərəkatının rəhbər


Bir qrup yerli jurnalistə ilin yekunları ilə əlaqədar müsahibə verən İlham Əliyevin həmin gün keçirilən bələdiyyə seçkisinin adını belə dilinə gətirməməsi Azərbaycanda yerli seçkilərin mənasızlığının ən bariz göstəricisidir. Ötən il 36 milyon manat büdcə gəlirləri olan bələdiyyələrə bu il dövlət büdcəsində 5,7 manat dotasiya və subvensiya nəzərdə tutulduğu halda, dünənki seçkilərin keçirilməsi üçün 56,6 milyon manat Mərkəzi Seçki Komissiyasının, 8,6 milyon manat isə dairə seçki komissiyalarının və katibliyinin saxlanılmasına vəsait xərcləndi. Bir sözlə, dövlət büdcəsindən seçkinin təşkilinin maliyyələşdirilməsi adı altında 65,2 milyon manat israf olundu. Halbuki, seçki şousu ilə bələdiyyələri tamam gözdən salamaqdansa seçki pullarının onların arasında bölüşdürməyin daha çox faydası olardı,” Qubad İbadoğlu deyib.

XS
SM
MD
LG