ABŞ prezidenti Co Bayden çərşənbə axşamı bəyan edib ki, ölkədəki hər yetkin şəxsin 19 aprel tarixinə qədər - əvvəlcədən açıqlanan 1 may tarixindən təxminən iki həftə əvvəl koronavirusa qarşı peyvənd almaq imkanı olacaq.
ABŞ-da mövcud üç peyvənd tədarükü genişləndikcə, Bayden keçən həftə ABŞ yetkinlərinin təxminən 90%-nin 19 aprel tarixinə qədər peyvənd oluna biləcəyini qeyd etsə də, indi o, vaksinasiyanı bütün yetkinlər üçün genişləndirir.
ABŞ-da aparılan sorğular göstərir ki, yetkinlərin təxminən 20% -i müxtəlif səbəblərə görə vaksinasiyadan imtina edəcəklərini deyirlər. Bəziləri bunun lazımsız olduğunu və ya inyeksiyaların zərərli ola biləcəyini düşündüklərini, bəziləri isə hökumət tərəfindən hazırlanan bir proqrama inamsızlıqlarını ifadə ediblər.
Peyvənd olunan insanların əksəriyyəti bir gün və ya bunun qədər davam edən müvəqqəti reaksiyalar olduğunu və ya tibbi reaksiyaların olmadığını bildirməsindən sonra peyvəndlərə qarşı çıxanların nisbəti son bir neçə ayda azalıb.
Yanvar ayında vəzifəyə başlamazdan əvvəl vaksinasiya olunan Baydenin Vaşinqton ətrafındakı Virginiya ştatının şəhər kənarında peyvəndləmə məntəqəsini ziyarət etdikdən sonra Ağ Evdə ölkədə “vaksinasiyanın durumu” ilə bağlı açıqlamalar verəcəyi gözlənilir.
Hökumətin son rəqəmləri göstərir ki, 62 milyondan çox amerikalı tam peyvəndlənib. Bu, ölkənin 18 yaş və daha artıq yetkin əhalisinin təxminən 23% -ni təşkil edir. 107 milyondan çox insan Moderna və ya Pfizer-BioNTech peyvəndlərinin ən azı bir dozasını, ya da Johnson & Johnson tərəfindən istehsal olunan tək dozalı peyvəndi qəbul edib.
