Accessibility links

Brüsseldə Avropa İttifaqı-Azərbaycan Əməkdaşlıq Şurasının iclası keçirilib


Avropa Ittifaqı-Azərbaycan Əməkdaşlıq Şurasının iclası

Dekabrın 18-də Brüsseldə Azərbaycan-Avropa İttifaqı (Aİ) Əməkdaşlıq Şurasının 17-ci iclası keçirilib.

Avropa İttifaqının Əməkdaşlıq Şurası iclasının nəticələri ilə bağlı məlumatında deyilir ki, Avropa İttifaqının Xarici İşlər və Təhlükəsizlik Siyasəti üzrə ali nümayəndəsi Cozep Borrell sədrliyi ilə keçirilən şura iclasında Qonşuluq və İttifaqın Genişlənməsi məsələləri üzrə Avropa İttifaqının komissarı Oliver Varhelyi də iştirak edib. Azərbaycanın nümayəndə heyətinə xarici işlər naziri Ceyhun Bayramov rəhbərlik edib.

Əməkdaşlıq Şurası iclasında Aİ-Azərbaycan arasında birgə razılaşdırılmış Tərəfdaşlıq Prioritetlərinin icrası, Azərbaycanın islahat gündəliyi, Aİ-Azərbaycan arasında yeni ikitərəfli razılaşmanın perspektivləri, koronavirus pandemiyası və onun təsirləri, Dağlıq Qarabağ və onun ətrafında son dövrlərdə aparılmış genişmiqyaslı hərbi əməliyyatlardan sonra yaranmış vəziyyət nəzərdən keçirilib.

Ali nümayəndə Cozep Borrell bildirib ki, Aİ Azərbaycanla demokratiya, insan hüquqları və fundamental azadlıqlara əsaslanan yeni iddialı və hərtərəfli bir saziş bağlamaq istəyir.

“Bu, Azərbaycan iqtisadiyyatının şaxələndirilməsinə, ticarət əlaqələrimizin inkişaf etməsinə və əməkdaşlığımızın hüdudlarını daha da genişləndirməyimizə kömək edəcək. Aİ Minsk Qrupu həmsədrləri ilə sıx komplementarlıq şəklində Dağlıq Qarabağ münaqişəsinin davamlı həllinin dəstəklənməsində və formalaşdırılmasında rol oynamağa hazırdır. Bunu dəstəkləmək naminə sülh quruculuğu və yenidənqurma üzrə vasitələrimizdən istifadə etməyə hazırıq,” o qeyd edib.

Qonşuluq və Genişlənmə üzrə komissar Oliver Varhelyi deyib ki, Aİ Azərbaycanın enerji, ticarət, sərmayə və bağlantılar kimi sahələrində əsas tərəfdaşıdır.

“Cənub Qaz Dəhlizinin tamamlanmasında bu il əldə olunan mühüm tərəqqiyə əsaslanaraq, onun Qərbi Balkanlara qədər uzadılması imkanını araşdırmaq istəyirik. COVID-19 pandemiyası kontekstində, o cümlədən ölkənin iqtisadiyyatının şaxələndirilməsinə və səhiyyə sisteminin bərpa olunma qabiliyyətinin gücləndirilməsində göstərdiyimiz dəstəklə ölkənin sosial-iqtisadi bərpası istiqamətində Azərbaycanla işləməyə davam edəcəyik. Əlavə humanitar yardımın göstərilməsi, münaqişənin əsaslı şəkildə həll olunması istiqamətində və daha uzunmüddətli sosial-iqtisadi inkişaf naminə çalışmaq üçün 10 milyon avro ayırmağa hazırıq,” komissar qeyd edib.

Tərəfdaşlıq Prioritetlərinin icrasını nəzərdən keçirərkən Aİ ilə Azərbaycan enerji sektorunda əməkdaşlığın çox gözəl olduğunu qeyd edib. Azərbaycandan ilk qazın Cənub Qaz Dəhlizi üzərindən 2020-ci ilin sonuna qədər göndərilməsi gözlənilir.

Məlumatda deyilir ki, şura iclasında eyni zamanda Azərbaycanda demokratiya, qanunun aliliyi, insan hüquqları və fundamental azadlıqlar, xüsusən birləşmə azadlığı, ifadə azadlığı və media azadlığı ilə bağlı çağırışlar da nəzərdən keçirilib. Şurada, yeni hərtərəfli saziş və Ümumi Aviasiya Məkanı Sazişi ətrafındakı danışıqların vəziyyəti müzakirə edilib.

Şura iclasında COVID-19 pandemiyasının yaratdığı problemlərə də toxunulub, insanların həyat və yaşayışını, ölkədə cəmiyyət və iqtisadiyyatı yenidən bərpa etmək üçün Avropa İttifaqı tərəfindən Azərbaycanın səylərinə dəstək vurğulanıb.

Aİ və Azərbaycan, noyabrın 10-da hərbi əməliyyatlar dayandırıldıqdan sonra Dağlıq Qarabağ və onun ətrafındakı vəziyyət, Aİ-nin bərpa və barışıqdakı rolu, habelə regional məsələlərlə bağlı fikir mübadiləsi aparılıb. Aİ-Azərbaycan arasında Əməkdaşlıq Şurasının iclası Aİ-Ermənistan arasında Tərəfdaşlıq Şurası iclasından bir gün sonra baş tutub.

“Bu görüşlər Aİ-nin bölgədəki ölkələrlə tərəfdaşlığının və Aİ-nin bölgənin bərpasına və sülhün davamlı olmasına dəstəyinin vacib olduğunu bir daha xatırladır,” məlumatda deyilir.

Əməkdaşlıq Şurasının iclası ərəfəsində Avropa İttifaqı 2019-cu ilin aprelindən bəri Azərbaycanda və Aİ-Azərbaycan münasibətlərində baş verən son hadisələr barədə hesabat da yayımlanıb.

Amerika İcmalı

Amerika İcmalı - 22 Oktyabr, 2021
please wait

No media source currently available

0:00 0:29:58 0:00
XS
SM
MD
LG