Britaniya Müdafiə Nazirliyi cümə günü bildirib ki, Rusiya Hərbi Hava Qüvvələrinin uzaqmənzilli aviasiyasının Ukraynaya zərbə endirməsindən 21 gün keçir.
Bu ilin əvvəlində, martın 9-dan aprelin 28-dək də hücumlarda analoji sakitlik olub. Nazirliyin dediyinə görə, Ukraynanın milli infrastrukturuna qarşı qış kampaniyasından sonra 51 günlük fasilə "çox ehtimal ki" döyüş sursatlarının tükənməsi ilə bağlıdır.
Bununla belə, Britaniya nazirliyinin fikrincə, hazırkı fasilə çox güman ki, Rusiyanın AS-23 raketlərinin "mövcud ehtiyatlarını" saxlaması və Ukraynaya qarşı ağır qış hücumlarından əvvəl ehtiyatlarını artırmaq üçün vaxtdan istifadə etməsi ilə bağlıdır.
Ukrayna prezidenti Volodimir Zelenski cümə axşamı gündəlik müraciətində ABŞ-ın Rusiya nefti üçün qlobal səviyyədə müəyyən edilmiş qiymət məhdudiyyətlərini pozan şirkətlərə sanksiyalar tətbiq etdiyini və "təzyiqləri davam etdirməyi və Rusiyanı enerji resursları vasitəsilə təcavüzü maliyyələşdirmək imkanından məhrum etməyin vacib" olduğunu deyib.
Zelenski həmçinin bildirib ki, cümə axşamı Avropa Şurası Parlament Assambleyasının "1932-33-cü illərdəki Qolodomoru Ukrayna xalqının soyqırımı" kimi tanıması tarixi həqiqət üçün çoxdan gözlənilən addımdır . "Aclıqdan ölüm" mənasını daşıyan "Qolodomor" Sovet diktatoru İosif Stalin dövründə süni aclıq təşkil edilərək, 3 milyondan çox ukraynalının ölümünə səbəb olan plan idi. Bir çox ölkə bunu soyqırım aktı adlandırıb.
Rusiya cümə axşamı Belqorod vilayətində vurulan Ukrayna pilotsuz təyyarəsinin parçalarının 3 nəfərin ölümünə səbəb olduğunu bildirib.
Vilayətin qubernatoru Vyaçeslav Qladkov Telegram kanalında dağıntıların bir evi dağıtdığını və dağıntılar altından üç cəsədin çıxarıldığını deyib.
Rusiya Müdafiə Nazirliyi Hava Hücumundan Müdafiə Qüvvələrinin Ukraynanın pilotsuz uçuş aparatının Belqorod səmasında vuraraq, hücumunun qarşısını aldığını bəyan edib.
Belqorod Rusiyanın Ukrayna ilə həmsərhəd bölgələrindən biridir.
Ukrayna ordusu cümə axşamı bildirib ki, Ukrayna Hava Hücumundan Müdafiə Qüvvələri Rusiyanın bir neçə bölgəni hədəf alan 33 pilotsuz təyyarəsindən 28-ni məhv edib.
Forum