Britaniyanın müxalifətdə olan Leyboristlər partiyasının lideri Ceremi Korbin cümə günü bildirib ki, o, iyun ayında ABŞ prezidenti Donald Trampın səfəri zamanı keçiriləcək rəsmi şam yeməyinə dəvətdən imtina edib.
“Tereza Mey əhəmiyyətli beynəlxalq sazişləri dağıdan, iqlim dəyişikliyini inkar edənləri dəstəkləyən, irqçi və seksist ritorikadan istifadə edən prezidentin dövlət səfəri zamanı, onun qarşısında qırmıza xalça açmamalıdır.” – deyə, Korbin bəyanatında bildirib.
Müxalifət lideri deyib ki, Birləşmiş Ştatlarla münasibətlərin saxlanılması dövlət səfərinin təmtəraqlı keçirilməsini məcbur etmir. Korbin əlavə edib ki, buna baxmayaraq, “maraq mövzularının müzakirəsi üçün” Trampla görüşə müsbət cavab verə bilər.
