Martın 4-nə keçən gecə Ermənistan Silahlı Qüvvələrinin kəşfiyyat-təxribat qrupu qoşunların təmas xəttində Azərbaycanın mövqelərinə yaxınlaşaraq ərazini minalamağa cəhd göstərib. Bu barədə Azərbaycan Müdafiə Nazirliyinin mətbuat xidməti məlumat yayıb.
"Silahlı Qüvvələrimizin bölmələrinin əvvəlcədən düşməni aşkar etməsi, görülən qabaqlayıcı tədbirlər və qarşı tərəfə atəş gücü vasitəsilə təsirdən sonra düşmən itki verərək geri çəkilməyə məcbur edilib. Hadisə yerində düşmənə məxsus iki ədəd mina, iki ədəd qumbara və istifadə etmək istədikləri qana bulaşmış ləvazimatlar aşkar olunub. Silahlı Qüvvələrimizin bölmələri heç bir itki verməyib", Müdafiə Nazirliyinin mətbuat xidmətinin məlumatında deyilir.
Ermənistan tərəfi buna hələ münasibət bildirməyib.
