Azərbaycan Xarici İşlər naziri Elmar Məmmədyarov bu gün Vaşinqtonda ABŞ Dövlət katibi Hillari Klintonla görüşüb. Görüşdən öncə mətbuat üçün açıqlama verən Dövlət katbi Klinton Azərbaycan və ABŞ arasında strateji əlaqələrin əhəmiyyətini vurğuladı və iki ölkənin ikitəfərli əməkdaşlıq sahəsində, regional və qlobal məsələlər üzərində birgə iş apardığını qeyd etdi. “Biz əlaqələrimizi genişləndirmək və dərinləşdirmək, eyni zamanda, Minsk qrupu vasitəsilə Dağlıq Qarabağ münaqişəsinin nizamlanması səylərini davam etdirmək işinə sadiq qalırıq.”-deyə Dövlət katibi Klinton bəyan etdi.
Azərbaycan Xarici İşlər naziri Elmar Məmmədyarov Azərbaycan və ABŞ arasında əməkdaşlığın gücləndirilməsi və dərinləşməsinin əhəmiyyətini və ABŞ-ın regiona sülh gətirmək səylərini qeyd etdi.
Görüşdən sonra jurnalistlərin suallarını cavablandıran Azərbaycan Xarici İşlər naziri ABŞ Dövlət katibi ilə ikitərəfli münasibətləri əhatə edən geniş məsələlərin müzakirə edildiyini bildirdi. Onun sözlərinə görə, danışıqlarda Dağlıq Qarabağ münaqişəsinin nizamlanması diqqət mərkəzində oldu.
Xarici işlər naziri Məmmədyarovun dövlət katibi Klintonla görüşdən sonra jurnalistlərin suallarına cavablarını aşağıdakı videoda izləyin.
