Accessibility links

Dövlət Departamenti Tofiq Yaqublunun azad edilməsinə çağırır


Birləşmiş Ştatlar hökuməti Azərbaycanda müxalifət lideri Tofiq Yaqublunun həbsindən və ona qarşı ittihamlardan narahatdır. Bunu ABŞ Dövlət Departamentinin sözçüsü Turan İnformasiya Agentliyinin Vaşinqtondakı müxbiri Ələkbər Raufoğluna bildirib.

Yaqublu 22 martda “xuliqanizm” ittihamları ilə həbs olunub. Onun ailəsi və insan haqları qrupları COVID-19 pandemiyası şəraitində müxalifət liderinin həbsə salınmasından narahatlıq keçirirlər.

“Biz həbslə bağlı baş verənləri yaxından izləyirik və öz naharatlığımızı Azərbaycan hökumətinə çatdırmışıq. Biz Azərbaycan rəsmilərini cənab Yaqublunu və öz fundamental azadlıqlarını ifadə etdiklərinə görə həbs edilmiş bütün şəxsləri azad etməyə çağırırıq,” sözçü Turan müxbirinə bildirib.

ABŞ rəsmisi əlavə edib ki, Vaşinqton fundamental azadlıqları dəstəkləyir və Azərbaycandan bu sahədə öz öhdəliklərinə uyğun davranmağı gözləyir. “Bütün dünya boyu hökumətlər COVID-19 pandemiyasına reaksiya verdikcə biz Azərbaycan rəsmilərini insan haqlarına və fundamental azadlıqlara, o cümlədən azad mətbuatın ictimaiyyətə böhran və hökumətin ölçüləri barədə məlumatlandırmaq imkanlarına məhdudiyyətlərdən yayınmağa çağırırıq. Şəffaflıq və dürüst məlumat pandemiya zamanı sağlamlıq və insan təhlükəsizliyi üçün vacibdir.”

Tofiq Yaqublu martın 22-də saxlanılıb və martın 23-də Bakının Nizami rayon Məhkəməsi onun barəsində təqsirləndirilən şəxs qismində 3 aylıq həbs qətimkan tədbiri seçib.

Daxili İşlər Nazirliynin Mətbuat xidmətinin rəisi Ehsan Zahidov bildirib ki, martın 22-də paytaxtın Nizami rayonu ərazisində Tofiq Yaqublunun idarə etdiyi “Toyota Corolla” markalı avtomobil Elxan Cəbrayılovun idarə etdiyi “VAZ-2107” markalı avtomobillə toqquşub. Faktla bağlı Nizami Rayon Polis İdarəsində Cinayət Məcəlləsinin 221.3-cü (xuliqanlıq, silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) maddəsi ilə cinayət işi başlanılıb.

Bundan öncə AŞPA həmməruzəçisi Sunna Evarsdottir aparıcı müxalif siyasətçi Tofiq Yaqublunun xuliqanlıq ittihamı ilə həbs olmasına reaksiya olaraq bildirib: "Mənim indiyədək eşitdiyim hər şey cənab Yaqubluya qarşı ittihamların uydurma olduğunu və onun yenidən siyasi məhbus olduğuna işarə edir. Belə görünür ki, Azərbaycan höküməti yeni razılaşdırılmış siyasi repressiya dalğası başladıb". Sunna Evarstdottir bunu ölkənin Avropa Şurasındakı gələcəyi üçün yaxşı hal olmadığını söyləyib.

Həmməruzəçilər Sunna Evarsdottir, Sör Rocer Geyl və Stefan Şennak cümə axşamı Azərbaycan Prezidenti İlham Əliyevin Novruz bayramı təbrikində koronavirus pandemiyası ilə mübarizə çərçivəsində ölkədəki müxalifəti təcrid edəcəyinə işarə etməsinə münasibət bildirib.

"Azərbaycan hökümətinin rüsvayçı şəkildə koronavirus pandemiyasından ölkədə təzyiqlərə üzləşən siyasi müxalifətə qarşı yenidən təqiblər aparmaq üçün sui-istifadə etməsi məni heyrətləndirir və dəhşətə gətirir. Hər hansı dövlət başçısının ictimai sağlamlıqla bağlı fövqəladə vəziyyətdən hakimiyyətini gücləndirmək üçün sui-istifadə etməsi inanılmazdır," Sör Rocer Geyl deyib.

Həbs olunmazdan bir gün öncə Amerikanın Səsinə müsahibədə Tofiq Yaqublu Prezident İlham Əliyevin müxalifətlə hədə tonunda danışmasını tənqid etmişdi.

Amerika İcmalı

Amerika İcmalı - 24 Sentyabr 2021
please wait

No media source currently available

0:00 0:28:23 0:00
XS
SM
MD
LG