Accessibility links

Avropa Komissiyası Ukrayna və Moldovaya Aİ-na namizəd statusu verilməsini tövsiyə edib


Avropa Komissiyasının sədri Ursula Von Der Leyen

Avropa Komissiyası Ukrayna və Moldovaya Avropa İttifaqına üzv olmaq üçün namizəd statusunun verilməsini tövsiyə edib. Bu hər iki ölkə üçün uzunmüddətli üzvlük prosesində ilk addımdır.

İyunun 17-də Komissiya sədri Ursula Von Der Leyen tərəfindən açıqlanan tövsiyə gələn həftə Brüsseldə keçiriləcək sammitdə 27 ölkənin liderləri tərəfindən müzakirə ediləcək.

Bu addım Ukraynanın qonşusu Rusiyanın fevral ayından ölkənin səbəbsiz işağalına başlaması fonunda atılıb.

Ursula Von Der Leyen mətbuat konfransı zamanı deyib ki, ukraynalılar “Avropa arzusu” uğrunda “ölməyə hazırdılar”.

Ukrayna Prezidenti Volodimir Zelenski deyib ki, bu qərar “şübhəsiz ki, qələbəmizi daha da yaxınlaşdıracaq.”

Komissiya həmçinin bu ilin yazında üzvlüyünü təqdim edən başqa bir ölkə - Gürcüstanın isə yalnız müəyyən şərtləri yerinə yetirdikdən sonra namizəd statusu alacağını bildirib. "Bir sıra prioritetlər həll edildikdən sonra Gürcüstana namizəd statusu verilməlidir" deyə bəyanatda bildirilir.

"Müvəffəq olmaq üçün ölkə indi siyasi cəhətdən bir araya gəlməli, struktur islahatları və Avropa İttifaqına doğru aydın bir yol - lazımi islahatları konkret şəkildə müəyyən edən, vətəndaş cəmiyyətini idarə edən və geniş siyasi dəstəkdən faydalanan yol hazırlamalıdır" deyə Von Der Leyen Gürcüstanın üzvlük statusu haqqında danışarkən bildirib.

Üzvlük danışıqlarının başlanması üçün bütün üzv ölkələrin yekdil razılığı lazımdır. Avropa İttifaqına namizədliklə bağlı tövsiyə əvvəlki illərdə bu qədər sürətli şəkildə verilməmişdi.

Aİ liderlərinin iyunun 23-24-də keçiriləcək sammitində Ukraynanın namizəd statusunu təsdiqləyəcəkləri gözlənilir. Lakin bununla belə statusla əlaqədar sərt şərtlər də var və üzvlüyün tam əldə olunması illər, hətta onilliklər çəkə bilər.

Məsələ ilə əlaqədar Rusiya yaydığı bəyanatda Ukraynanın Aİ-yə üzv olmaq səylərini yaxından izlədiyini bildirib.

Kremlinin mətbuat katibi Dmitri Peskov deyib ki, "bu məsələ bizim böyük diqqətimizi çəkir, çünki biz hamımız Avropada Aİ-nin müdafiə komponentinin gücləndirilməsi ilə bağlı müzakirələrin intensivləşməsindən xəbərdarıq".

Jurnalistlərlə telefon brifinqində Peskov həmçinin bildirib ki, "Müxtəlif transformasiyalar var ki, biz onları ən diqqətli şəkildə müşahidə edirik"

XS
SM
MD
LG