Mayın 3-də Tələbə Güc Mərkəzi Təşkilatının fəalları Azərbaycan Dövlət İqtisad Universitetinin binası qarşısında etiraz aksiyası keçirməyə cəhd edib. Etirazşılar əllərində "Tələbəyə ədalət!" banneri tutub.
Bu zaman polis aksiyanın qarşısını alıb və iştirakçıların əksəriyyəti saxlanılıb. Saxlanılanlar arasında Rəvan Axundov, Əhməd Məmmədli, Fərid Cabbar, Tükəzban Qasımova və fəal Rüstəm İsmayılbəyli də olub.
Aksiya iştirakçılarının sözlərinə görə, universitetdə müəllimlər imtahanların keçirilməsi qaydalarına etiraz edən tələbələri təhdid edir.
“Tələbələrə imtahan sualları verilmir. Bu da təbii ki, tələbələrə çətinlik yaradır. Bundan əlavə biz tələb edirik ki, onlayn qaydada keçirilən dərslərdə qayıb limiti götürülsün,” aksiyanın bəyanatında deyilir.
Daxili İşlər Nazirliyinin mətbuat xidməti bildirib ki, aksiya iştirakçıları ərazidən uzaqlaşdırılıb, saxlanılanlar yoxdur.
