Accessibility links

Həbsdə olan Mehdi İbrahimov 8-ci gündür aclıq edir


Azərbaycan Xalq Cəbhəsi Partiyasının (AXCP) Rəyasət Heyətinin üzvü Məmməd İbrahimin həbsdə olan oğli Mehdi İbrahimov 8-ci gündür aclıq edir.

Bu barədə onun qardaşı Turan İbrahim məlumat yayıb.

“Evə zəng etmir. Özü ilə əlaqə saxlaya bilmirik. Vəkil ilə də görüşə icazə vermirlər. 8-ci gündür aclıq edir. Bu səbəblərdən səhhətinin necə olmasını bilmirik. Bir dəfə epilepsiya keçirib. Rejimdən Mehdiyə və şərləyərək həbs etdiyi bütün dostlarımıza azadlıq tələb edirik!” Turan İbrahim Amerikanın Səsinə bildirib.

Vəkil Aqil Layıcov Amerikanın Səsinə bildirib ki, hüquqlarını müdafiə etdiyi Mehdi İbrahimovla görüşə icazə verilmir.

"Bu gün Mehdi İbrahimov barəsində seçilən həbs qətimkan tədbirinin ev dustaqlığı imkan tədbiri ilə əvəz edilməsi barədə vəsatət verəcəm. Onun səhhətinin necə olması barədə də hər hansı məlumat ala bilmirəm. Mehdi İbrahimovla görüşümə icazə verilməməsi, onun səhhətinin necə olması barədə məlumat verilməməsi və ailəsi ilə telefon əlaqəsi saxlaya bilməməsi ilə bağlı ombudsmana şikayət göndərmişəm. Amma hələ hər hansı cavab ala bilmirəm" o, Amerikanın Səsinə deyib.

Hazırda 3 saylı Müalicə Müəssisəsində saxlanılan Mehdi İbrahimovun səhhəti ilə bağlı hər hansı məlumat verilmir. Amerikanın Səsinin Penitensiar Xidmətdən bununla bağlı məlumat almaq cəhdi də baş tutmayıb.

Yalnız o məlumdur ki, avqustun 14-də Ombudsman Aparatının Milli Preventiv Qrupunun üzvləri Mehdi İbrahimovla görüşüb.

Ombudsman Aparatının məlumatına görə, Mehdi İbrahimov barəsində aparılan istintaqın gedişindən narazılığını əsas göstərərək yemək qəbulundan imtina edəcəyini bildirib, eyni zamanda, səhhətindən şikayətlənib.

“Qeyd olunmalıdır ki, tövsiyə əsasında müəssisədə tibbi xidmətin əlçatanlığı təmin edilməklə 24 saat ərzində həkim nəzarəti təşkil olunub, psixoloq konsultasiyaları da aparılır,” məlumatda qeyd edilir.

Fəalın ailəsi bildirib ki, Mehdi ibrahimov avqustun 10-da aclığa başlayıb.

“Mehdi İbrahimov avqustun 10-dan aclıq aksiyasına başlayıb. Cəmi bir dəfə evə bir dəqiqəlik zəng edib. Ombudsman deyir biz yaxşı işləyirik, bizdən şikayət etməyin. Elə budur yaxşı işləməkləri? Günlərdir əlaqə saxlaya bilmirik. Taleyindən xəbərsizik,” onun qardaşı Turan İbrahim Facebook səhifəsində yazıb.

Mehdi İbrahimov iyulun 14-15-də Azərbaycan Ordusuna dəstək məqsədi ilə keçirilən aksiyadan sonra saxlanılıb.

AXCP funksionerinin iqtidarda olan Yeni Azərbaycan Partiyasının üzvü olan oğlu Mehdi İbrahimov karantin qaydalarını pozaraq COVİD-19 infeksiyasını yaymaqda ittiham olunaraq batrəsində 3 aylıq həbs qətimkan tədbiri seçilib.

Müdafiə tərəfi Mehdi İbrahimovun insident törədənlərin arasında olmadığını və bunu sübut edən hər hansı video, foto faktın olmadığını bildirir. Mehdi İbrahimovun ailəsi onun COVİD-19 İinfeksiyasının daşıyıcısı olmadığını və karantinə alınmadığını deyib.

Mehdi İbrahimin həbsindən sonra onun atası Məmməd İbrahimə qarşı Cinayət Məcəlləsinin 186.2.1-ci (zərər çəkmiş şəxsə böyük ziyan vurmaqla əmlakın qəsdən məhv edilməsi və ya zədələnməsi), 233-cü (ictimai qaydanın pozulmasına səbəb olan hərəkətlərin təşkili və ya belə hərəkətlərdə fəal iştirak), 315.1-ci (hakimiyyət nümayəndəsinə qarşı müqavimət və ya zorakılıq tətbiq etmək) və 278.1-ci (hakimiyyətin zorla ələ keçirilməsinə yönələn hərəkətlər) maddələri üzrə ittiham irəli sürülüb. Bu maddələr üzrə fəalı 20 ilədək azadlıqdan məhrum olunma təhlükəsi gözləyir.

Nəsimi Rayon Məhkəməsinin qərarı ilə Məmməd İbrahim barəsində 4 ay müddətinə həbs qətimkan tədbiri seçilib.

Məmməd İbrahim məhkəmədə həbsinin əsassız və qanunsuz olduğunu bildirib. O qeyd edib ki, iyulun 14-15-də keçirilən aksiyada ümumiyyətlə iştirak etməyib və heç kimi bu nümayişə göndərməyib, hansısa qanunsuz hərəkətlərə təhrik etməyib.

AXCP-nin məlumatına görə, Azərbaycanın dövlət sərhədinin Tovuz rayonu istiqamətində döyüşlərdə iştirak edən Azərbaycan Ordusunu dəstəkləmək məqsədi ilə iyulun 14-15-də keçirilən aksiya zamanı yaranan insident faktı üzrə qaldırılmış cinayət işi üzrə bu partiyanın 47 nəfər fəalı həbs edilib.

“Onlardan 17 nəfərinə qarşı ağır ittihamlar irəli sürülüb. 17 nəfər inzibati qaydada həbs edilib. 1 nəfər ev dustaqlığındadır. 12 nəfər şahid qismində dindirilərək sərbəst buraxılıb. AXCP-nin 10 üzvü isə öncədən siyasi məhbusdur. Beləliklə, hazırda AXCP-nin 43 fəalı siyasi sifarişlə həbsdədir,” məlumatda qeyd edilir.

Qısa tarixcə və rəsmi məlumat

İyulun 14-də Bakıda minlərlə insanın Ermənistan-Azərbaycan sərhədində gedən döyüşlərə dəstək məqsədilə keçirdiyi yürüş-mitinq iyulun 15-də səhərə yaxın polis tərəfindən dağıdılıb. Aksiyanın dağıdılması zamanı polis su şırnaqlarından, gözyaşardıcı qazdan və dəyənəklərdən istifadə edib.

Belə ki, gecə saatlarında bir qrup aksiya iştirakçısı parlamentin binasına daxil olub, polis avtomobili aşırılıb. Bu zaman polis aksiyaçıları parlamentin binasından çıxarıb və polislə qarşıdurma yaşanıb. Çoxsaylı insan saxlanılıb.

Dünyaya Baxış

Dünyaya Baxış. Rusiyada universitet kampusuna silahlı hücum edilib - ölənlər var
please wait

No media source currently available

0:00 0:12:06 0:00

Amerika İcmalı

Amerika İcmalı - 11 Sentyabr hücumlarının 20-ci ildönümü
please wait

No media source currently available

0:00 0:30:02 0:00
XS
SM
MD
LG