Accessibility links

İran ABŞ-ı sanksiyalardan imtina etməyə çağırır


İran prezidenti İbrahim Rəisi

İran şənbə günü ABŞ-ı İslam respublikasına qarşı sanksiyaları dayandırmağa çağırıb və ABŞ prezidenti Co Baydeni sələfi Donald Trampla eyni "çıxılmaz vəziyyət" siyasətini davam etdirməkdə günahlandırıb.

Xarici İşlər Nazirliyinin sözçüsü Səid Xətibzadə ABŞ-ın Maliyyə Nazirliyinin ABŞ-da İran əsilli bir amerikalı jurnalisti oğurlamağı planlaşdırmaqda günahlandırılan dörd iranlıya qarşı maliyyə sanksiyaları elan etməsindən bir gün sonra açıqlamalar verib.

"Vaşinqton anlamalıdır ki, sanksiyalara aludəçiliyindən əl çəkmək və İrana qarşı həm ifadələrində, həm də davranışlarında hörmət göstərməkdən başqa seçimi yoxdur" - deyə, Xətibzadə mətbuata açıqlamasında bildirib.

Trampın prezidentliyi dövründə Vaşinqton Tehranla dünyanın aparıcı dövlətləri arasında imzalanan 2015-ci il nüvə sazişindən birtərəfli şəkildə çıxıb. Çoxtərəfli razılaşmada İrana nüvə proqramının məhdudlaşdırılması qarşılığında sanksiyaların aradan qaldırılması təklif edilib. Trampın 2018-ci ildə ABŞ-ı razılaşmadan çıxarmaq qərarı razılığın pozulmasına səbəb olub.

Şənbə günü İran prezidenti İbrahim Rəisi keçən ay vəzifəyə başladıqdan sonra ilk televiziya müsahibəsində müqavilənin canlandırılması səylərinin "hökumətin gündəmində olduğunu, amma Qərbin təzyiqi altında olmadığını" söyləyib.

"Bir neçə dəfə amerikalılar və avropalılar dialoq qurmaq üçün təzyiq göstərməyə çalışdılar, amma boşa çıxdı" - deyə, Rəisi dövlət televiziyasında yayımlanan müsahibədə bildirib.

Bayden bildirib ki, Vaşinqtonu yenidən pakta qaytarmaq istəyir, lakin Vyanada apreldə başlayan danışıqlar ultra mühafizəkar Rəisinin iyun ayında İranda keçirilən prezident seçkilərində qalib gəlməsindən sonra dayandırılıb.

Avqustun sonunda Ali dini rəhbər Ayətullah Əli Xameneyi Bayden administrasiyasını razılaşmanı canlandırmaqla bağlı danışıqlar zamanı sələfi Tramp ilə eyni tələbləri irəli sürməkdə günahlandırıb.

Çərşənbə axşamı İranın yeni xarici işlər naziri Hüseyin Əmir-Abdullahi Vyana danışıqlarının iki-üç ay müddətində bərpa olunmayacağını deyib.

Rəisi şənbə günü bildirib ki, "danışıqlar gündəmdədir, lakin danışıqlar naminə danışıqlar aparılmır".

"Bu danışıqlarda əzici sanksiyaların ləğvini əldə etməyə çalışırıq. Böyük İran millətinin maraqlarından imtina etməyəcəyik."

Tehran ABŞ-ın 2017 -ci ildən bəri ilk dəfə və ya yenidən tətbiq etdiyi bütün sanksiyaların ləğv edilməsini tələb edir.

XS
SM
MD
LG