Mayın 6-da Bakı Ağır Cinayətlər Məhkəməsi hakim Faiq Qəniyevin sədrliyi ilə Azərbaycan İslam Partiyasının sədr əvəzi İlham Əliyevin 16 il, onun qaynı Mehman Rzayevin 14 il azadlıqdan məhrum edilməsi barədə hökm çıxarıb.
Dövlət ittihamçısı İlham Əliyevə 18 il, Mehman Rzayevə isə 16 il həbs istəmişdi.
Onlar Cinayət Məcəlləsinin 274 -cü (Dövlətə xəyanət) və 193-cü (Yalançı sahibkarlıq) maddəsi ilə ittiham edilib. Məhkəmə qapalı keçirildiyindən itthamın məzmunu barədə məlumat verilməyib.
Vəkil Cavad Cavadov bildirib ki, məhkəmənin hökmündən apellyasiya şikayəti verəcək.
“İlham Əliyev ittihamları qəbul etmir və özünü təqsirli bilmir. Cinayət işinin materiallarında da ittihamı təsdiq edəcək hər hansı sübut yoxdur,” o qeyd edib.
Vəkilin sözlərinə görə, İlham Əliyevin işi ilə bağlı Avropa Məhkəməsinə ilkin şikayət verilib.
Əliyev 2020-ci il fevralın 29-da Dövlət Təhlükəsizliyi Xidməti tərəfindən təqsirləndirilən şəxs qismində saxlanılıb.
Azərbaycan İslam Partiyası 1991-ci ildə Bakının Nardaran qəsəbəsində təsis edilib. Partiya dövlət qeydiyyatından 1992-ci il sentyabrın 20-də keçib. 1995-ci ildə partiyanın sədri Əlikram Əliyev İrana casusluqda ittiham olunaraq həbs edilib və partiyanın dövlət qeydiyyatı Azərbaycan Ali Məhkəməsi tərəfindən ləğv edilib.
Daha sonra partiyanın sədri olan Mövsüm Səmədov 2011-ci ildə bir neçə tərəfdarı ilə qanunsuz silah saxlamaq, hakimiyyətin ələ keçirilməsi və başqa ittihamlarla müxtəlif müddətlərə həbs olunublar. Mövsüm Səmədov 12 il həbs cəzası alıb.
Həmin zamandan Mövsüm Səmədovun birinci müavini olan İlham Əliyev partiyanın sədr əvəzi vəzifəsini icra etməyə başlayıb.
