Accessibility links

Azərbaycanlı hüquq müdafiəçiləri fəalların həbsi ilə bağlı İrana müraciət ünvanlayıb


Azərbaycanda fəaliyyət göstərən insan hüquqları üzrə Birgə İşçi Qrupuna daxil olan bir qrup hüquq müdafiəçisi İran İslam Respublikasında son vaxtlarda fəalların həbs olunması ilə bağlı BMT-nin İnsan Hüquqları Komitəsinə və “Amnesty İnternational” təşkilatına müraciət edib.

Oktyabrın 14-də yayımlanan müraciətdə deyilir ki, Azərbaycanın fəaliyyət göstərən insan hüquqları üzrə Birgə İşçi Qrupuna daxil olan bir qrup hüquq müdafiəçiləri İran İslam Respublikasında son vaxtlarda həbs olunan fəalların taleyindən narahatdırlar:

"Artıq bəlli olduğu kimi 2020-ci ilin 27 sentyabrında başlanan və 44 gün ərzində davam edən İkinci Qarabağ müharibəsi qonşu İİR-da yaşayan əslən azərbaycanlı olan vətəndaşlar tərəfindən rəğbətlə qarşılanıb. Azərbaycanın 30 ildən sonra öz torpaqlarını azad etməsinə səs verən 12 nəfər fəal Azərbaycan Ordusuna dəstək və İranın Ermənistana yardımlarına etiraz olaraq Ərdəbil şəhərinin Ciral parkında aksiya keçirib. Aksiya zamanı İran rejiminin təhlükəsizlik qüvvələri tərəfindən döyülərək həbs edilən fəallara 2021-ci il 9 oktyabr tarixində Ərdəbil şəhəri məhkəməsi tərəfindən ümumiyyətlə 180 ay həbs və 888 qamçı cəzası hökmü çıxarılıb".

"Hüseyn Balaxani, Əsgər Əkbərzadə, Mostafa Pərvin, Morteza Pərvin, Moctaba Pərvin, Hamed Heidəri, Mohəmməd Çolani, Sobhan Bəkhşi, Mehdi Hüşmənd, Bəhmən Xeyrcu və Səccad Çolani Iran İslam Respublikası Cinayət Məcəlləsinin beşinci kitabının 607-ci maddəsinə əsasən təqsirli bilinərək hüquq-mühafizə orqanlarının əməkdaşlarına qarşı itaətsizlik göstərdikləri ittihamı ilə 7 ay 16 gün, ictimai asayişi pozmaq ittihamına görə 7 ay 16 gün həbs və 74 qamçı cəzasına məhkum ediliblər. Həmçinin Əsgər Əkbərzadə polis məmuruna xəsarət yetirməsi iddiası ilə cərimə olunub. Sonrakı günlərdə də oxşar məqsədlə İran Azərbaycanının müxtəlif şəhərlərində və Tehranda aksiyalar keçirən fəallar da həbs edilib və müvəqqəti azadlığa buraxılıblar" , müraciətdə qeyd edilir.

Azərbaycanın hüquq müdafiəçiləri İran İslam Respublikasından öz tələblərinə dəstək vermələrini istəyiblər:

"İran İslam Respublikasında son aksiyalar zamanı fəallara qarşı təhlükəsizlik qüvvələri tərəfindən fiziki zor və işgəncələrin tətbiq edilməsi, onlara qarşı qeyri-insani tərzdə davranması və həbs edilməsini insan hüquqlarının pozulması kimi qəti pisləyərək ciddi narazılığımızı bildirir, onların dərhal azadlığa buraxılmasını tələb edir və Sizdən bizim tələbimizə dəstək verməyinizi xahiş edirik”.

Müraciəti D.Əliyeva adına Qadın Hüquqlarının Müdafiəsi Cəmiyyətinin sədri Novella Cəfərova, İnsan Hüquqları və Qanunçuluğun Müdafiəsi Bürosunun sədri Səidə Qocamanlı, Beynəlxalq İnsan Hüquqları Təşkilatının Azərbaycan bölməsinin rəhbəri Səadət Bənənyarlı, Humanitar Tədqiqatlar Cəmiyyətinin sədri Əvəz Həsənov, Helsinki Vətəndaş Cəmiyyətinin Azərbaycan Milli Komitəsinin sədri Arzu Abdullayeva, Azərbaycan İnsan Hüquqları Mərkəzinin sədri Eldar Zeynalov, Azərbaycan İnsan Hüquqları Mərkəzinin proqramlar koordinatoru Zəlihə Tahirova və Neftçilərin Hüquqlarının Müdafiəsi Təşkilatının sədri Mirvari Qəhrəmanlı imzalayıblar.

Şərhlərə bax

Amerika İcmalı

Amerika İcmalı - 22 Oktyabr, 2021
please wait

No media source currently available

0:00 0:29:58 0:00
XS
SM
MD
LG