Virciniya ştatından konqresmen Cim Moran ABŞ-dakı azərbaycanlıları Novruz bayramı münasibətilə təbrik edib. Konqresmen Cim Moran ABŞ-da yaşayan azərbaycanlıların şəbəkəsi USAN-ın Novruz bayramının türk xalqlarının bayramı kimi tanınması kampaniyasına cavab olaraq təşkilatın direktoru Adil Bağırova məktub göndərib. Məktubda Virciniya konqresmeni bu mühüm bayram günündə azərbaycanlılara öz təbriklərini və xoş arzularını çatdırıb. Konqresmenin məktubunda deyilir ki, Birləşmiş Ştatların türk ölkələrindəki diplomatik missiyaları bu ölkələrin xalqlarına öz təbriklərini çatdırıblar. “Bunu məqsədəuyğun hesab edirəm və ümid edirəm ki, bu, Birləşmiş Ştatların Qafqaz və Mərkəsi Asiya ölkələri ilə əlaqələrinin daha da yaxınlaşmasına xidmət edəcək.” –deyə məktubda bildirilir.
Xatırlatmaq istəyirik ki, USAN artıq dördüncü ildir ABŞ prezidentinin illik Novruz müraciətinə İranla yanaşı, Qafqaz və Mərkəzi Asiya ölkələri, o cümlədən Azərbaycanın da daxil edilməsinə nail olmaq üçün məktub kampaniyası aparır.