ABŞ-ın Johnson&Johnson əczaçılıq şirkətinin çərşənbə günü bildirdiyinə görə, keçirdiyi klinik sınaqların nəticələri şirkətin COVID-19 peyvəndinin ikinci dozasının orijinal tək dozadan doqquz dəfə yüksək antitel reaksiyası verdiyini göstərib.
Şirkət açıqlamasında bundan əvvəl tək dozada peyvənd edilmiş şəxslər üzərində iki 1/2a fazalı sınaqlar apardığını bildirib. Bu araşdırmaların ilkin nəticələri göstərir ki, vaksinin gücləndirici (buster) dozası "virusa yapışan və onu neytrallaşdıran antitellərdə kəskin və güclü artıma səbəb olub."
Şirkət antitellərdəki artımın "birdəfəlik tək dozalı peyvənddən 28 gün sonra ilə müqayisədə doqquz dəfə yüksək olduğunu" deyib. Şirkətin bildirdiyinə görə, antitel reaksiyalarında əhəmiyyətli artımlar 18 ilə 55 yaş arasındakı iştirakçılarda və daha aşağı gücləndirici doza alan 65 yaş və yuxarı yaşlardakı insanlarda müşahidə edilib.
"1/2a mərhələsinin klinik sınaqları bir peyvəndin təsirini göstərmək üçün hazırlanmış 3-cü mərhələ sınaqlarından daha kiçikmiqyaslıdır" - deyə, şirkətin açıqlamasında bildirilib.
Johnson&Johnson 3-cü mərhələ sınaqları çərçivəsində 30 000-ə qədər insan üzərində iki dozalı peyvəndi araşdırır və bunun nəticələri hələ açıqlanmayıb.
Johnson&Johnson-un Qlobal Araşdırmalar Şöbəsinin rəhbəri Matay Mammen şirkətin araşdırmalarının nəticələrini ABŞ Ərzaq və Dərman İdarəsi (FDA), ABŞ-ın Xəstəliklərə Nəzarət və Qarşısının Alınması Mərkəzləri (CDC) və Avropa Dərman Agentliyinə (EMA) və digər sağlamlıq orqanlarına təqdim edəcəyini deyib.
Johnson & Johnson 1/2a mərhələsinin tədqiqatların təhlil edilməzdən əvvəl medRxiv onlayn tibb və sağlamlıq elmi arxivinə, eləcə də paylaşma serverinə təqdim edib.
