Accessibility links

Avropa məhkəməsi Emin Hüseynovun şikayəti üzrə kommunikasiyaya başlayıb


Emin Hüseynov

Avropa İnsan Hüquqları Məhkəməsi Reportyorların Azadlıq və Təhlükəsizlik İnstitutunun (RATİ)-nin keçmiş sədri Emin Hüseynovun Azərbaycan vətəndaşlığından çıxarılması ilə bağlı verdiyi şikayət üzrə kommunikasiyaya başlayıb.

Bu barədə vəkil Fariz Namazlı məlumat verib.

RATI-nin ofisində axtarış
RATI-nin ofisində axtarış

Məlumata görə ərizəçi göstərib ki, onun vətəndaşlıqdan çıxarılmağa məcbur edilməsi ilə Azərbaycan hökuməti Avropa İnsan Hüquqları Konvensiyanın 8-ci (Şəxsi həyata və ailə həyatına hörmət hüququ), 10-cu (Fikri ifadə etmək azadlığı), 13-cü (Səmərəli hüquqi müdafiə vasitələri hüququ) və 18-ci (Hüquqlarla bağlı məhdudiyyətlərdən istifadənin hədləri) maddələrini pozub.

Avropa Məhkəməsi hökümətə həmin maddələrin pozuntusunun baş verib-verməməsi ilə bağlı suallar göndərib.

2014-cü ilin avqustunda Hüseynovun rəhbəri olduğu Reportyorların Azadlıq və Təhlükəsizlik İnstitutunda (RATİ) prokurorluq axtarış aparıb, avadanlıqlar, sənədlər görtürülüb, ofisin qapıları möhürlənib.

RATİ-nin ofisi möhürlənib
RATİ-nin ofisi möhürlənib

Azərbaycan Xarici İşlər Nazirliyinin 2015-ci ilin fevralında yaydığı açıqlamada deyilir ki, prokurorluq Emin Hüseynovun barəsində Cinayət Məcəlləsinin 192 (qanunsuz sahibkarlıq), 213 (vergidən yayınma) və 308-ci (sui-istifadə) maddələri ilə cinayət işi başlayıb. Bunun əsasında 2014-cü il avqustun 19-da məhkəmənin qərarı ilə onun barəsində həbs qətimkan tədbiri seçilərək axtarış elan edilib.

Emin Hüseynov 2014-cü ilin avqustunda İsveçrənin (həmin vaxt ATƏT-in sədri olub) Bakıdakı səfirliyində sığınacaq almağa məcbur olub.

10 ay ərzində səfirlikdə gizləndiyi dövrdə İsveçrə hakimiyyəti EminHüseynova qarşı təqiblərin dayandırılması ilə bağlı danışıqlar aparıb.

Emin Hüseynov 2015-ci ilin iyununda Avropa Oyunlarının açılış mərasimində iştirak etmək üçün Bakıya gəlmiş İsveçrə XİN rəhbərinin təyyarəsi ilə Azərbaycanı tərk edib. Getməzdən öncə vətəndaşlıqdan məhrum edilib.

XS
SM
MD
LG