Accessibility links

Fikrət Hüseynlinin məhkəməsi yenidən təxirə salınıb


Fikrət Hüseynli

Fevralın 8-də Kiyev şəhərinin Apellyasiya Məhkəməsi jurnalist Fikrət Hüseynlinin işi üzrə təhqiqata baxışı davam etdirib və yenidən prosesi fevralın 13-dək təxirə salıb. Bu barədə Amerikanın Səsinə jurnalistin özü bildirib.

Onun sözlərinə görə, yanvarın 17-də və 31-də də məhkəmə təxirə salınıb.

Fikrət Hüseynli Azərbaycanda nəşr olunmuş “Azadlıq” qəzetinin əməkdaşı olub. O təqiblərlə üzləşdikdən sonra Azərbaycandan Niderlanda mühacirət edib və bu ölkənin vətəndaşlığını alıb. Jurnalist, 2017-ci il oktyabrın 14-də Azərbaycanın sorğusu əsasında İnterpol xətti ilə Kiyevdən Düsseldorfa uçarkən saxlanılıb.

Oktyabrın 18-də Ukraynanın Borispol şəhər Məhkəməsi onu Azərbaycana ekstradisiyası məsələsinə baxmaq üçün 18 gün müddətinə həbs edib.

Hüseynli ittihamları təkzib edib və ona qarşı cinayət işini siyasi sifariş adlandırıb.

Oktyabrın 27-də Kiyevin Lukyanovski Məhkəməsi Ukrayna Ali Radasının deputatı Mikola Knyajitskinin və ictimai xadim Boris Zaxarovun zaminliyi ilə Hüseynlini azad edib. Eyni zamanda, məhkəmə dövlət ittihamçısının Hüseynlinin Azərbaycana ekstradisiyası haqqında vəsatətini təmin etməyib.

Kiyev prokurorluğu Hüseynlinin azad edilməsindən apellyasiya şikayəti verib və onun həbs edilməsini tələb edib. Dekabrın 27-də etiraza baxılması müddəti başa çatıb.

Məhkəmə baxışının dalbadal üçüncü dəfə təxirə salınması jurnalist tərəfindən narazılıqla qarşılanır.

“Məhkəmənin uzadılması məni daha uzun müddətə Ukraynada saxlamağa hesablanıb. Görünür, Azərbaycan hakimiyyətindəki hansısa qüvvələrin Ukrayna hakimiyyətində kimlərləsə ciddi əlaqələri var. Bu əlaqələr vasitəsilə məhkəməni uzadırlar və nəticədə proses yekunlaşmır. Bu da mənim sənədlərimin Ukrayna Baş Prokurorluğuna göndərilməsini ləngidir və mən Ukraynada qalmağa məcbur oluram. Ukraynada qaldığım müddət faktiki işləyə bilmirəm, işləmədiyim halda bütün xərcləri özüm ödəyirəm. Bu səbəbdən həm də maddi zərərə düşürəm, borclarım getdikcə artıq. Hazırda səhhətimdə ciddi problem var. Buranın tanınmış klinikasının həkimləri rəy veriblər ki, əməliyyata ehtiyac var. Təəssüf ki, o rəyi prokurorluğa təqdim etsək də, yenə nəticə yoxdur. Ola bilsin ki, gözləyirlər Azərbaycan hakimiyyəti məni oğurlasın, bunlar da desin bizim günahımız yoxdur. Proses yekunlaşmamış Fikrətin günahından onu oğurladılar. Çünki mənə bildirilir ki, məni oğurlamaq üçün plan hazırdır. Sadəcə, uyğun zaman gözləyirlər”, o Amerikanın Səsinə bildirib.

Hüseynli bildirib ki, Niderland Xarici İşlər Nazirliyi onun işini daimi diqqətdə saxlayır.

“Niderlandın Ukraynadakı səfirliyi ilə daimi əlaqəm var. Sadəcə, onlar məhkəmənin uzadılması məsələsinə qarışa bilmirlər. Çünki sistemi elə qurublar ki, guya, burada qanunsuz hər hansı bir şey yoxdur. Ukrayna qanununa görə, məhkəmələr yekunlaşmamış iş bağlanıb prokurorluğa göndərilə bilməz”.

Onun sözlərinə görə, Sərhədsiz Repartyorlar təşkilatı işi daim nəzarətdə saxlayır.

“Lakin onların da bu bürokratiyaya təsir göstərmək imkanları yoxdur”, o qeyd edib.

XS
SM
MD
LG