Azərbaycanın Dövlət Sərhəd Xidmətinin əməkdaşları martın 20-də Xəzər dənizinin Astara rayonu istiqamətində (İranla sərhəddə) 11,9 kq narkotik vasitənin ölkəyə gətirilməsinin qarşısını alıb.
Dövlət Sərhəd Xidmətinin Mətbuat Mərkəzinin məlumatına görə, sərhəd gözətçi gəmisi tərəfindən Azərbaycana məxsus qayıq saxlanılıb. Üzmə vasitəsinin heyət üzvlərinin - Astara rayon Şahağacı kənd sakinləri Əliağa Quliyev və Seymur Quliyevin sərhəd sularında üzmə qaydalarını pozmaları müəyyən olunub.
Həmin ərazidə sərhəd gözətçi gəmisi tərəfindən keçirilmiş axtarış tədbirləri nəticəsində 1 buya bərkidilmiş 3 bağlama, həmin bağlamalarda 11,9 kq narkotik vasitəyə oxşar maddə aşkar olunub. Saxlanılmış üzmə vasitəsinin heyət üzvlərinin narkotik vasitələrin qaçaqmal yolu ilə ölkə ərazisinə gətirilməsində iştirakları müəyyən edilib.
Fakt üzrə zəruri əməliyyat və istintaq tədbirləri davam etdirilir.
