Nigeriyanın şimal-şərqində Yobi ştatının Potiskum şəhərindəki məktəbdə baş vermiş intiharçı hücumu çoxu şagird olmaqla, azı 48 nəfərin ölümünə səbəb olub. İntiharçının bombanı bu gün şagirdlərin səhər toplantısı vaxtı partlatdığı deyilir.
Səhiyyə işçiləri 79 nəfərin də yaralandığını bildirib ki, onlardan çoxu ağır vəziyyətdədir. Şahidlərin dediyinə görə, intiharçı məktəb formasında olub.
Hücumun məsuliyyətini öz üzərinə götürən olmasa da, Boko Haram yaraqlı qrupundan şübhələnilir. Bu qrupun keçən həftə Potiskumda dini mərasim zamanı həyata keçirilən və onlarla insanın ölümünə səbəb olan hücumda əli olduğu deyilir.